بریتانیا په افغانستان کې د خوړو د خوندیتوب او اقلیمي بدلونونو پر وړاندې د مبارزې نوی پروګرام پیلوي

د بریتانیا حکومت اعلان کړی چې په افغانستان کې به یو نوی پروګرام پیل کړي، چې موخه‌یې د خوړو خوندیتوب، د تغذیې ښه‌والی او د اقلیمي بدلونونو پر وړاندې د خلکو تاب‌ور تیا لوړول دي.تمه ده چې دغه پروګرام به شاوخوا نیم میلیون زیان‌منو افغانانو ته، چې نیمايي‌یې ښځې دي، مرسته وکړي څو ځانبساینې ته لاره ومومي.دا نوښت د ملګرو ملتونو د خوړو او کرنې سازمان (FAO) او د بریتانیايي مؤسسې «Afghan Aid» په همکارۍ پلي کېږي.د بریتانیا حکومت په یوې نننۍ (پنج‌شنبه) خپرې شوې خبرپاڼه کې ویلي چې دا پروګرام به وچکالۍ ته د مقاومت لرونکو تخمونو وېش، د مغذي محصولاتو ترویج، د اقلیم‌سره برابر کرنیز تمرینونه، او د اوبو د سرچینو مدیریت ته روزنه ورکړي، څو له سېلابونو سره مبارزه وشي.په خبرپاڼه کې ټینګار شوی چې افغانستان د اقلیمي بدلونونو له امله د خوړو د ناامنۍ له سختو ګواښونو سره مخ دی. دغه پروګرام هڅه کوي، په ځانګړې توګه د ښځو له ملاتړ سره، د سیمو د خلکو وړتیاوې لوړې کړي ترڅو له طبیعي بحرانونو سره مقابله وکولی شي.د بریتانیا د په منځني اسیا کې د افغانستان او پاکستان لپاره وزیر، همیش فالکونر، ویلي: «په افغانستان کې بشري بحران د میلیونونو کسانو ژوند اغېزمن کړی دی. دا نوی پروګرام د تغذیې او د خوړو د خوندیتوب د ښه‌والي لپاره، په ځانګړې توګه د زیان‌منو ښځو لپاره، طرحه شوی دی.»د ملګرو ملتونو د ارزونو له مخې، له ۲۳ میلیونو ډېر افغانان د بشردوستانه مرستو اړتیا لري؛ یوه برخه دا بحران د پرله‌پسې وچکالیو او د اقلیمي بدلونونو له امله رامنځته شوی، چې د ګڼو کورنیو ژوند یې د خوړو له ناامنۍ سره مخ کړی دی.د پروګرام نهایی موخه دا ده چې افغانستان یو «خوندي، باثباته او د اقلیمي ګواښونو پر وړاندې مقاومت لرونکی» هېواد شي.