د افغانستان د خبریالانو مرکز: د طالبانو ابتدايي محکمه په تخار کې درې نیول شویو خبریالانو ته د برائت حکم ورکړی

د افغانستان د خبریالانو مرکز په یوه خبرپاڼه کې ویلي چې د طالبانو ابتدايي محکمه په تخار ولایت کې د درېیو سیمه‌ ییزو خبریالانو لپاره د برائت پرېکړه کړې، چې له یوې میاشتې زیات یې د تبعیدي رسنیو سره د همکارۍ په تور نیول شوي وو.د دغه مرکز د معلوماتو له مخې، د تخار یوې سیمه‌ ییزې سرچینې ویلي چې دا علنۍ محکمه د چهارشنبې په ورځ، د غبرګولي ۲۸مه، د تخار ولایت مرکز تالقان ښار کې جوړه شوې وه. دا محکمه د نصرت‌الله ابراهیمي، منیر هدف او اسدالله تیمور قضیې ته ځانګړې شوې وه؛ هغوی د «افغانستان انټرنشنل» ټلوېزیون ته د راپور ورکولو په تور نیول شوي وو. په غونډه کې یاد خبریالان، د دوی وکیلان او یو شمېر خپلوان هم حاضر وو.منیر هدف او اسدالله تیمور، چې دواړه خپلواکه خبریالان دي، د روان لمریز کال د ثور میاشتې پر ۱۵مه، او نصرت‌الله ابراهیمي، چې د آریانا نیوز خبریال دی، د غویی پر ۱۶مه، د تالقان امنیه قومندانۍ ځواکونو له خوا نیول شوي وو.یو سیمه‌ ییز خبریال چې موضوع یې له نږدې تعقیب کړې، ویلي چې یاد خبریالان تر درېیو اوونیو زیات د امنیه قومندانۍ او تالقان بندخونو کې بنديان وو، وروسته بیا د نورو څیړنو لپاره د تخار استخباراتو ریاست ته ولیږدول او هلته یې ۱۵ ورځې نور هم تېرې کړې.سرچینې زیاته کړې چې دا درې خبریالان د غبرګولي په ۱۴مه، د قربانۍ اختر په مناسبت د ځینو پېژندل شویو کسانو په ضمانت، لنډمهاله او مشروط ډول خوشې شوي وو.د افغانستان د خبریالانو مرکز ټینګار کړی چې د دې خبریالانو نیول له پيله غیرقانوني وو، او باید هېڅکله له ازادۍ بې‌برخې شوي نه وای. دا مرکز له طالبانو غوښتي چې نور نیول شوي خبریالان هم بې له قید او شرطه خوشې کړي او خبریالانو ته اجازه ورکړي چې د هېواد د مطبوعاتو د قانون له مخې له خپلو بنسټیزو حقونو څخه ګټه واخلي.یادونه باید وشي چې دا مهال لږ تر لږه ۱۱ خبریالان او یا د رسنیو کارکوونکي د طالبانو له خوا نیول شوي او یا هم د بند موده تېروي.