د افغان ښځو د بایسکل چلونې د اتلولۍ سیالۍ به په فرانسه کې ترسره شي

د بایسکل‌ چلونې نړیوال فدراسیون (UCI) اعلان کړی چې د افغان ښځو د بایسکل چلونې د اتلولۍ سیالۍ به د ۲۰۲۵ کال د جون میاشتې په ۲۶مه او ۲۸مه، د فرانسې د ونده ولایت په «لز اربیه» ښار کې ترسره شي.دا لومړی ځل دی چې له ۲۰۲۲ کال وروسته، افغان ښځې د خپلواک ټیم په چوکاټ کې، په رسمي ډول د خپلو ملي سیالیو لپاره میدان ته راځي.په دغو سیالیو کې به پنځه افغان بایسکل‌چلونکې ګډون وکړي: فریبا هاشمي، یولدوز هاشمي، زهرا رضایي، سمیرا احراري او مهناز محمدي. درې لومړۍ چلونکې به په دواړو برخو، یعنې ټاکلي وخت او جاده‌یي سیالیو کې برخه اخلي، خو دوه وروستۍ به یوازې د جاده‌یي بایسکل چلونې سیالۍ ووهي.فریبا هاشمي، چې د ۲۰۲۲ کال اتله وه، ویلي: «زه له پوره احساس او چمتووالي سره سیالیو ته ورځم، هیله لرم چې دا سیالۍ د نورو افغان ورزشکارانو لپاره هم د ځليدو زمینه برابره شي.»دغې بایسکل چلونې سیالۍ د فرانسې د بایسکل‌ چلونې فدراسیون (FFC) او نړیوال فدراسیون (UCI) په ګډه همکارۍ ترسره کېږي. افغان ورزشکارانې به د فرانسوي سیالانو ترڅنګ سیالي کوي، خو پایلې به یې د افغانستان لپاره په جلا جدول کې ثبتېږي.د نړیوال فدراسیون مشر دیوید لاپارتینت دا یوه احساساتي او د ویاړ وړ پیښه بللې، او ویلي یې دي چې دا ډول نړیواله همغږي د ورزش د سولې غوښتونکی روحیه پیاوړې کوي.د فدراسیون په وینا، د افغان لوبډلې د سفر، استوګنې او تخنیکي ملاتړ ټول لګښتونه به د UCI نړیوال مرکز پر غاړه واخلي.