ریچارد بنت: په ایران کې له پنځو میلیونو ډېر افغانان خوندیتوب ته جدي اړتیا ده

د ملګرو ملتونو د بشري حقونو ځانګړي راپور ورکوونکي، ریچارد بنت، د ایران په خاوره کې د افغان کډوالو وضعیت ته په اندېښمنه سترګه ګوري. نوموړي نن شنبه، د غبرګولي ۳۱مه، په خپله ایکس پاڼه کې لیکلي: «په ایران کې له پنځو میلیونو ډېر افغان کډوال خوندیتوب ته جدي اړتیا لري.»
ښاغلي بنت ویلي چې د شته وضعیت له مخې اړینه ده دواړه خواوې هم ایران او هم نړیواله ټولنه – زغم وښيي، د بشري حقونو نړیوالو اصولو ته درناوی وکړي، او بېړني ګامونه د ملکي وګړو، په ځانګړي ډول افغان کډوالو د خوندیتوب لپاره پورته کړي.
دا څرګندونې پر داسې مهال کېږي چې د وروستیو ورځو په بهیر کې د ایران د امنیتي وضعیت خرابېدو او د بهرني سیاستونو د اغېزو له امله، په دغه هېواد کې مېشت افغان کډوال له جدي فشارونو، نیونو، سپکاوي، اجباري شړلو او نورو بشري ستونزو سره مخ دي.
د بشر حقونو سازمانونه، مدني فعالان او د افغان ټولنې استازي په پرله‌پسې توګه د دې وضعیت په اړه خبرداری ورکوي او له ملګرو ملتونو او نورو نړیوالو بنسټونو غواړي چې د افغان کډوالو د ژوند، عزت او خوندیتوب لپاره جدي او عملي اقدام وکړي.