د ایران چارواکي: په تهران کې د افغان کډوالو د ایستلو لړۍ چټکه شوې ده

د تهران والي، محمد صادق معتمدیان، ویلي چې په پلازمېنه تهران کې د بې‌سند افغان کډوالو د پېژندنې او ایستلو عملیات له جديت او شدت سره روان دي.د ایراني رسنیو د راپور له مخې، نوموړي دا څرګندونې د غبرګولي ۳۱مه، د عسکرآباد له کمپ څخه د لیدنې پر مهال کړې او دغه ګام یې «امنیتي او ټولنیزه اړتیا» بللې. هغه زیاته کړې چې د پولیسو، ښاروالیو او د بهرنیو وګړو د چارو مرکز په نږدې همغږۍ سره دا بهیر پر مخ وړي.د معتمدیان په وینا، هغه کډوال چې بې له قانوني اسنادو په ایران کې ژوند کوي، له ښاري او غیرښاري خدماتو بې‌برخې شوي، او تر پېژندنې وروسته بېرته د افغانستان پولې ته استول کېږي.خو په همدې حال کې یو شمېر افغان کډوال شکایت کوي چې سره له دې چې د وتلو قانوني اسناد یا د سرشمېرنې کارت لري، بیا هم د ایران پرېښودو ته نه پرېښودل کېږي. تر اوسه ایراني چارواکو په دې تړاو رسمي غبرګون نه‌دی ښودلی.ایران په وروستیو میاشتو کې د شاوخوا دوه میلیونه افغان کډوالو د استوګنې اسناد لغوه کړي دي. دغه اسناد تر دې وړاندې د قانوني استوګنې لپاره معتبر بلل کېدل.اوس افغان کډوال باید د «کفالت دفتر» له لارې د وتلو اسناد ترلاسه کړي او د ټاکل شوې مودې په دننه کې له ایرانه ووځي؛ که نه، له جریمې او جبري ایستلو سره به مخ شي.