یونیسف: د کابل د اوبو رسولو سیسټم له بیا رغونې وروسته ۴۰۰۰ کورنۍ پاکو اوبو ته لاسرسی پیدا کړی

د ملګرو ملتونو د ماشومانو د ملاتړ صندوق (یونیسف) وايي، د افغانستان د بشردوستانه صندوق (CBPF) د مالي ملاتړ په مرسته یې په کابل ښار کې د اوبو یو رسوونکی سیسټم بیا رغولی، چې له امله یې ۴۰۰۰ نورو کورنیو ته د پاکو اوبو د لاسرسي زمینه برابره شوې ده.یونیسف نن یکشنبه، د چنګاښ میاشتې په لومړۍ نېټه، په ټولنیزو رسنیو کې لیکلي: «پاکو اوبو ته لاسرسی د ژوند ژغورنه ده.»دغه بنسټ ټینګار کړی چې د حیاتي زیربناوو لکه د اوبو رسولو شبکو بیا رغونه، د هغو بشردوستانه هڅو یوه برخه ده چې موخه یې له اړمنو کورنیو سره مرسته ده.تر دې وړاندې د ملګرو ملتونو ادارو ویلي، وچکالي په افغانستان کې یوه اساسي بشري بحران ګرځېدلې ده. د ځمکې لاندې اوبو د سطحې بې‌ساري کمښت، د څاه‌ګانو وچېدل، د اوبو له کموالي راولاړې ناروغۍ او د زرګونو کورنیو جبري کډوالي، د فاجعې نوې بڼې ته لاره هواره کړې ده.یادونه باید وشي چې د یونیسف او اوچا په څېر ادارو له هڅو سره سره، لا هم هېواد د اقلیمي بدلونونو د ناوړه پایلو د مقابله لپاره جدي مالي منابعو او اوږدمهاله پلان ته اړتیا لري.