د زلاله هاشمي خاوند د هغې د وژل کېدو خبرونه رد کړ

له هغه راپدېخوا چې د افغانې هنرمندې زلاله هاشمي تری تم کېدو ته له دوه اوونیو زیات وخت تېر شوی، د هغې خاوند وايي چې په ټولنیزو رسنیو کې د وژل کېدو او د جسد موندلو خپاره شوي خبرونه حقیقت نه لري.د ښاغلي هاشمي په وینا، مېرمن یې شاوخوا ۱۸ ورځې وړاندې په کابل کې تری تم شوې او تر اوسه یې د برخلیک یا وضعیت په اړه هېڅ ډول معلومات نه لري. هغه ټینګار کوي چې تر دې دمه هېڅ رسمي اداره له دوی سره کره معلومات نه دي شریک کړي.بل‌خوا، طالبان ادعا کوي چې زلاله هاشمي “داوطلبانه” خپل کور پرېیښی دی. د طالبانو د کابل د امنیه قوماندانۍ ویاند، خالد زدران، د جمعې په ورځ (۳۰ غبرګولی) ویلي، چې د دوی د پولیسو لومړنۍ پلټنې هېڅ نښه نه ښيي چې دا قضیه اختطاف یا په زور شوې وي.نوموړی زیاتوي چې څېړنې روانې دي او که نور جزئیات ترلاسه شي، له رسنیو سره به شریک شي.خو د زلالې د خاوند څرګندونې او د طالبانو ادعا ترمنځ څرګند اختلاف، د دغې ځوانې هنرمندې د برخلیک په اړه اندېښنې زیاتې کړې دي او دا پوښتنې راپورته کوي چې په افغانستان کې د تری تم شویو کسانو دوسیې څنګه تعقیبېږي.