د ملګرو ملتونو د امنیت شورا نن د افغانستان په اړه غونډه کوي

د ملګرو ملتونو د امنیت شورا ټاکل شوې چې نن به د افغانستان په اړه غونډه ترسره کړي. د ملګرو ملتونو د مرستو ماموریت (یوناما) دفتر په خپله رسمي پاڼه کې ویلي چې په دې غونډه کې به رزا اوتنبایوا، د ملګرو ملتونو د عمومي منشي ځانګړې استازې او د یوناما مشرې، د افغانستان د وضعیت په اړه خبرې وکړي.یوناما مخکې هم ویلي و چې د ملګرو ملتونو د عمومي منشي انتونیو ګوترش نوی راپور به په دې غونډه کې وړاندې شي. په دغه راپور کې چې د پنجشنبې (د غبرګولي ۲۹مه) خپور شوی، ویل شوي چې افغان ښځې د زیاتېدونکو بنديزونو لکه د محرم د لازمي کېدو، د زده‌کړې او د کار بندیزونو له امله ورځ تر بلې له عامه ژوند او ټولنیزو اړیکو څخه لرې شوې دي.د ملګرو ملتونو عمومي منشي د دغو بندیزونو پلي کول د افغانستان د نړیوالې ټولنې سره د رغنده تعامل پر وړاندې یو لوی خنډ بولي او ژر تر ژره د ښځو پر وړاندې د جوړښتي زورزياتي د ختمولو غوښتنه کوي.ښاغلي ګوترش له نړیوالې ټولنې غوښتي چې د افغان ښځو ملاتړ ته ځانګړې پاملرنه وکړي او طالبان دې د دغو بندیزونه د رفع کولو لپاره تر فشار لاندې راولي.