د ملګرو ملتونو د بشر حقونو دفتر: تلپاتې سوله د ښځو له حضور پرته په ډیپلوماسۍ کې نه ترلاسه کېږي

د ملګرو ملتونو د بشر حقونو دفتر د ښځو د نړیوالې ډیپلوماسۍ د ورځې په مناسبت په خپاره کړي پیغام کې ویلي، ښځې د جګړو په لومړۍ کرښه او د ټولنو د بیا رغونې په بهیر کې مهم رول لري، خو لا هم له د سولې له خبرو اترو ایستل کېږي.دغه نړیوال بنسټ نن دوشنبه (٢ د چنګاښ) پر خپله اکس پاڼه خبرداری ورکړی چې هغه ډیپلوماسي چې ښځې له پامه غورځوي، نه یوازې د جګړو حقیقت نه ښيي، بلکې د هغو د ختمېدو لپاره د دوامدارو حل‌لارو په موندلو کې هم پاتې راځي.په پیغام کې زیات شوي: «د ټولو شالیدونو او هویتونو لرونکو ښځو غږ باید د پریکړو په مرکز کې وي. هغه بنسټونه چې د ښځو له‌خوا مشري کېږي، باید ملاتړ، خوندي او تمویل شي. سوله باید ټول‌ګډونه، پر بشري حقونو ولاړه، او د هغو کسانو له ژوندي تجربو سرچینه واخلي چې د جګړو ډېر اغېز پرې شوی دی.»د بشر حقونو دفتر د امنیت شورا له‌ خوا د ۱۳۲۵ پرېکړه‌ لیک له تصویبېدو ۲۵ کاله وروسته، لا هم د هغو جوړښتي خنډونو د له‌منځه وړو پر اړتیا ټینګار کوي، چې ښځې له ډیپلوماسۍ او تصمیم‌ نیونې لیرې ساتي.ملګرو ملتونو ویلي چې د ښځو د بشپړ، برابر او مانا لرونکي ګډون ملاتړ کوي او ټینګار کوي چې دا ګډون نه یوازې بهیرونه پیاوړي او عادلانه کوي، بلکې د تلپاتې سولې تضمین هم دی.دغه دفتر همداراز ویلي، ښځې د تلپاتې سولې جوړوونکې او ساتونکې دي.