ملګرو ملتونو: که اوس اقدام و نه‌شي، د افغانستان د نجونو نسل به په تیاره کې لاهو شي

د بروکسل په یوه تازه غونډه کې، چې د اروپايي اتحادیې لوړپوړو چارواکو پکې ګډون کړی و، په افغانستان کې د ملګرو ملتونو د ځانګړي استازي مرستیالې، ایندریکا راتواته، خبرداری ورکړی چې د افغانستان د روان بشري کړکېچ دوام تر ټولو ډېر د دې هېواد د نجونو راتلونکې له ګواښ سره مخ کوي.دغه غونډه د جون پر ۱۶ او ۱۷ نېټه جوړه شوې وه. راتواته په کې وویل چې میلیونه افغان نجونې له خپلو بنسټیزو حقونو لکه ښوونې، روغتیا او امنیت نه محرومې پاتې دي، او که نړیواله ټولنه جدي اقدام و نه‌کړي، نو د نجونو یو نسل به د محرومیت او هېرېدو تر سیوري لاندې لوی شي.هغې ټینګار وکړ: «موږ باید د موقتي مرستو له پړاو څخه تېر شو او پر زده‌کړو او پياوړي کولو پانګونه وکړو؛ که دا کار و نه‌کړو، نو راتلونکی نسل، په ځانګړي ډول نجونې، به په تیارو کې له‌منځه لاړې شي.»د راتواته په وینا، د نړیوالو مرستو کمېدو په سلګونو روغتیايي مرکزونه او حمایتي خدمات تړلي، چې ګڼ شمېر له تاوتریخوالي او تبعیض پاتې شوې نجونې‌یې د ژوند د رغولو هیله لرله.هغې د اقلیمي بدلون ستونزې ته هم اشاره وکړه او ویې ویل، په کلیوالو سیمو کې نجونې د ښوونځي پر ځای کیلومترونه مزل کوي تر څو اوبه راوړي، داسې یو مسوولیت چې د ژوند دروند بار له ماشومتوبه پر دوی ور اچوي.راتواته همداراز د افغانانو پراخې کډوالۍ ته اشاره وکړه او خبرداری یې ورکړ چې د ګڼو ځوانانو ستنیدل پرته له دې چې ښوونیز او کاري فرصتونه ورته برابر شي، د افراط‌ګرۍ د ودې لامل ګرځي؛ یو خطر چې د زده‌کړې په نه‌شتون کې نجونې لا سخت ګواښي.د هغې په وینا، که څه هم د ښځو له‌خوا رهبري کېدونکو کاروبارونو شمېر په وروستیو کلونو کې زیات شوی، خو لا هم د بازار، زده‌کړو او مالي سرچینو نشتون ورته جدي خنډونه جوړ کړي دي.