رزا اوتونبایوا: د ښځو پر وړاندې د بندیزونو دوام، افغانستان نړیوالې ټولنې ته د بېرته ستنېدو مخه نیسي

د ملګرو ملتونو د سرمنشي ځانګړې استازې رزا اوتونبایوا وايي، چې پر ښځو او نجونو د بندیزونو دوام، یو له اساسي خنډونو څخه دی چې افغانستان د نړیوال نظام سره یوځای کېدو ته نه پرېږدي.نوموړې دا څرګندونې د دوشنبې په ورځ، د چنګاښ په ۲مه نېټه، د ملګرو ملتونو د امنیت شورا په ناسته کې وکړې او ویې ویل: “نړیواله ټولنه لا هم د افغان ښځو له بنسټیزو حقونو څخه د محرومیت په اړه ژوره اندېښمنه ده.”مېرمن اوتونبایوا زیاته کړه، چې یوناما له افغان ولس سره پراخ تماس لري او ډېر خلک نړیواله ټولنه د روانو ناخوالو مسؤله ګڼي.هغې د دوحې د راتلونکو غونډو یادونه وکړه او ویې ویل، تمه ده چې د “موزاییک” نومې طرحې او د هغې د تطبیق پر جزییاتو خبرې وشي.د نوموړې په وینا، د دې طرحې هدف دا دی چې افغانستان ورو ورو له نړیوالې ټولنې سره یوځای شي.خو هغې ټینګار وکړ، چې پرته له دې چې د بشر حقونه، په تېره د ښځو حقونه، ښه نه شي، دغه بهیر به عملي نه شي.دا څرګندونې داسې مهال کېږي چې طالبان نږدې څلور کاله کېږي، ښځې او نجونې له زده‌کړو، کار او ټولنیزو فعالیتونو منع کړي دي.د ملګرو ملتونو سرمنشي انتونیو ګوترش هم په یوه وروستي راپور کې ویلي، چې نجونې د څلورم کال لپاره هم له زده‌کړو محرومې دي.