ملګري ملتونه: د افغانستان خلک له پرله‌پسې بشري کړکېچونو سره مخ دي

د ملګرو ملتونو د سرمنشي مرستیالې د بشري چارو لپاره، جویس مسویا، د امنیت شورا په ناسته کې د افغانستان د پېچلي او بحراني وضعیت په اړه خبرداری ورکړی او ویلي یې دي چې د دغه هېواد خلک له ګڼ‌شمېرو او مخ پر زیاتېدو بشري ستونزو سره لاس‌وګرېوان دي.نوموړې دا څرګندونې د دوشنبې په ورځ، د چنګاښ ۲مه، په نیویارک کې وکړې او د لسیزو جګړه، ژوره بې‌وزلي، اقلیمي بدلونونه، پر ښځو سخت بندیزونه او د مالي منابعو کمښت یې د افغانستان د بشري وضعیت د خرابېدو اساسي عوامل وبلل.د مسویا په وینا، د مورانو د مړینې کچه په افغانستان کې د نړیوال منځنۍ کچې څخه دوه نیم چنده زیاته ده، او میلیونونه وګړي له لوږې او خوارځواکۍ سره مخامخ دي. هغې وویل: «د افغانستان له هر پنځو وګړو یو یې وږي دی، او له هر پنځو درې تنه د شدیدې خوارځواکۍ ښکار دي.»هغې همداراز د نجونو د زده‌کړو پر دوامداره بندیز نیوکه وکړه او زیاته یې کړه چې شاوخوا ۳.۷ میلیونه ماشومان له ښوونځیو پاتې دي، چې له دې ډلې ۲.۲ میلیونه یې نجونې دي چې له زده‌کړو محرومې شوې دي.یو بل جدي خبرداری چې مسویا ورکړ، د کابل د اوبو بحران و. هغې وویل چې کابل له یوه بې‌ساري وچکالۍ سره مخ دی، او ښايي دا د نړۍ لومړۍ پلازمېنه وي چې د اوبو له سخت کمښت سره مخامخ شي.د خبرو په بله برخه کې، هغې د افغانو ښځینه مرسته‌رسونکو رول ستایلی او ویلي یې دي چې دوی، سره له ګواښونو او بندیزونه، لا هم هغو ټولنو ته خدمت کوي چې له بشري مرستو بې‌برخې دي.جویس مسویا همداراز ویلي چې تازه ۲.۴ میلیونه ډالر د افغانستان د بشري مرستو له صندوقه ځینو هغو ځایي بنسټونو ته ځانګړي شوي، چې پخوا ورته لږ پام شوی و.