د ښځو لپاره د دیپلوماسۍ نړېواله ورځ؛ ملګري ملتونه: ښځې باید د خبرو مېز ته حاضره وي

ملګرو ملتونو د «ښځو لپاره د دیپلوماسۍ نړېوالې ورځې» په مناسبت ټینګار کړی چې ښځې باید په نړیوالو پرېکړو او بهرني سیاست کې اغېزمنه ونډه ولري.د یوناما له‌خوا نن سه‌شنبه (۳ د چنګاښ) خپور شوی راپور ښيي چې سره له نړیوالو ژمنو، لا هم ښځې په ډیپلوماسۍ کې له سختو خنډونو، تبعیض او تاوتریخوالي سره مخ دي.د ملګرو ملتونو د ښځو ادارې د شمېرو له مخې، تر ۲۰۲۵ کال پورې یوازې ۲۵ هېوادونه د ښځو تر مشرۍ لاندې دي، او ښځې د نړۍ په کابینه‌وو کې یوازې ۲۲.۹ سلنه برخه لري.له ۱۹۴۷ کال راهیسې تر اوسه پورې، یوازې ۷ سلنه سفیران ښځې وې، او ۷۳ هېوادونه هېڅ ښځینه سفیره نه لري.ملګري ملتونه وايي، د ښځو پر وړاندې سیاسي تاوتریخوالی، جنسیتي کلیشې، او د مهمو وزارتونو نه شتون، د اندېښنې وړ دي، او له حکومتونو غواړي چې د ښځو د ګډون لپاره قانوني ملاتړ، خوندي فضا او سهمیه‌بندي رامنځته کړي.دا ورځ، چې د ملګرو ملتونو د عمومي شورا له لوري په ۲۰۲۲ کال کې نړېواله وپېژندل شوه، موخه یې د ښځو رول، لاسته راوړنې او ننګونې په ډیپلوماسي کې څرګندول دي.د ملګرو ملتونو مرستیالې سرمنشي آمنې محمد په خپل پیغام کې ویلي: “اړینه ده چې ښځې د خبرو اترو مېز ته کښېني، غږ یې واورېدل شي او رول یې په نړیوال سیاست کې وپېژندل شي.”