سیما باهوس: د ښځو له پیاوړي ګډون پرته، په افغانستان کې دوامداره سوله ناشونې ده

د ملګرو ملتونو د ښځو د ادارې اجرائیه مشرې، سیما باهوس، خبرداری ورکړی چې که ښځې په سیاسي بهیرونو کې پراخ او مانادار ګډون و نه لري، نو په افغانستان کې تلپاتې سولې ته رسېدل ناشوني دي.نوموړې دا خبرې د دوشنبې په ماښام، د چنګاښ په ۲مه نېټه، د ملګرو ملتونو د امنیت شورا غونډې ته وکړې او زیاته‌یې کړه چې د خپلې دندې له پیل راهیسې، د افغان ښځو او نجونو وضعیت بې‌سارې خراب شوی دی. د باهوس په وینا، نه یواځې دا چې د طالبانو له‌خوا لګول شوې بندیزونه نه دي لرې شوي، بلکې دا بندیزونه اوس د دوی د رسمي جوړښت برخه ګرځېدلي دي.هغې وویل چې د ښځو سیستماتیک ځپل اوس قانوني بڼه غوره کړې، او افغان ښځو له نړیوالې ټولنې څخه د مرستې پرلپسې غوښتنې بې‌ځوابه پاتې شوي دي. باهوس خبرداری ورکړ چې د ښځینه مرستندویانو پر وړاندې بندیزونه او د اړمنو ښځو ته د مرستو رسولو خنډونه، د نړیوالو ادارو د فعالیت وړتیا سخت کمه کړې ده.د افغانستان د جنسیتي شاخص د وروستي راپور په حواله، باهوس وویل چې د هېواد تقریباً یوه‌پر‌دریمه برخه نفوس، چې ډېری یې ښځې او ماشومان دي، له لوږې او خوارځواکۍ سره مخ دي. نوموړې دا وضعیت “له بحرانه هم اوښتی” وباله او ویې ویل چې دا “د یوې نسل ویجاړتیا ده”.باهوس له امنیت شورا وغوښتل چې د طالبانو سره د تعامل پر مهال باید ناخواسته د دوی تبعیضي سیاستونو ته مشروعیت ور نه کړي. هغې ټینګار وکړ چې هیڅ ډول هوکړه پرته له د ښځو له پوره او برابر ګډون څخه، دوام نه شي کولی.هغې همداراز پر دې ټینګار وکړ چې بشري مرستې باید دوام ومومي، د ښځو لپاره باید په ډیجیټلي مهارتونو کې پانګونه وشي، او د ښځو د ځپلو حالت باید نور عادي ونه ګڼل شي. باهوس زیاته کړه:”په جنسي توپیر سره د ۲۰ میلیونه ښځو سیستماتیک ظلم د منلو وړ نه دی، او نړۍ باید د دې وضعیت منلو ته عادت نه شي.”