په جنیوا کې د ښځو د حقونو فعالان: په افغانستان کې باید جنسیتي اپارتاید رسمي وپېژندل شي

د ملګرو ملتونو د بشري حقونو شورا په مرکز، جنیوا کې، د یوې ځانګړې غونډې پر مهال د ښځو د حقونو یو شمېر پېژندل شویو فعالانو او شخصیتونو غوښتنه وکړه چې د طالبانو تر واکمنۍ لاندې په افغانستان کې روان وضعیت باید د جنسیتي اپارتاید په توګه رسمي وپېژندل شي.یاده غونډه د افغانستان د ښځو د وضعیت د څلورم دور راپور د “د ښځو پر وړاندې د تبعیض مخنیوي کمیټې” (CEDAW) ته د وړاندې کولو سره هم‌مهاله ترسره شوه. په غونډه کې د افغانستان دایمي استازي نصیر احمد اندیشه، سیما سمر، شکریه بارکزي او فوزیه کوفي ګډون کړی و.نصیر احمد اندیشه وویل، سره له دې چې افغانستان له ۲۰۰۳ کال راهیسې د دې کنوانسیون غړی دی، د طالبانو تر بیا واک ته رسېدو وروسته، د ښځو وضعیت له یو خطرناک شاتګ سره مخ شوی دی.فوزیه کوفي څرګنده کړه چې افغان ښځې عملاً له ټولنیزو برخو شړل شوې دي او طالبانو په لوی لاس دوی له ټولنې ایستلې دي.شکریه بارکزي د ښځو روان وضعیت د تاریخ له بدترینو مرحلو وبللو او ویې ویل چې د زده‌کړو او کار بندیز د بشري حقونو او نړیوالو قوانینو ښکاره خلاف‌ دی. هغې ټینګار وکړ چې طالبان فرهنګي برخې یوازې د ښځو د ځپلو لپاره پلمه کوي.د غونډې ګډونوالو د ملګرو ملتونو له غړو هېوادونو وغوښتل چې د افغان ښځو، په ځانګړي ډول هغو چې له جدي خطر سره مخ دي، د خوندیتوب لپاره باید بېړني او عملي اقدامات وکړي.په پای کې له CEDAW کمېټې غوښتنه وشوه چې روان وضعیت د جنسیتي اپارتاید په توګه وپېژني او طالبان د ښځو د حقونو د سیستماتیکو سرغړونو لپاره مسئول وګڼي.