باختر خبري آژانس: له ايران نه په يوه ورځ کې تر ۳۰ زرو ډېر افغان کډوال بېرته راستانه شوي

د طالبانو تر واک لاندې باختر خبري آژانس راپور ورکړی چې په يوه ورځ کې له ۳۰ زرو زيات افغان کډوال له ايران نه بېرته افغانستان ته راستانه شوي دي.په دې راپور کې نن د چنګاښ په ۵مه (پنجشنبه) خپور شوی، ويل شوي چې دا کسان تېر ماښام د هرات له پولو هېواد ته دننه شوي دي.د يادونې وړ ده چې دوه ورځې مخکې هم ۱۶۸۵ کورنۍ له بېلابېلو پولي لارو افغانستان ته راستنې شوي وې.دغه شمېرې چې د طالبانو تر کنترول لاندې خبري آژانس خپرې کړې دي، د هغه دوامداره حالت ښکارندويي کوي چې له څو مياشتو راهيسې سخت شوی او د زرګونو کډوالو کورنيو ژوند يې اغېزمن کړی دی.دا راستنېدل په داسې حال کې دوام لري چې په وروستيو مياشتو کې ګاونډيو هېوادونو، په ځانګړي ډول ايران او پاکستان، پر ناقانونه افغان کډوالو خپلې سخت‌دريځې پاليسۍ لا زياتې کړې دي.د پخوا خپرو شويو راپورونو له مخې، يوازې تېر کال کې ميليونونه افغان کډوال يا په خپله خوښه يا هم په زور بېرته افغانستان ته لېږدول شوي دي.