ملګري ملتونه: په افغانستان کې ۱۳۰ زره کورنۍ پاکو اوبو ته لاسرسی موندلی

د ملګرو ملتونو د پراختیایي برنامې (UNDP) ویلي چې د افغانستان په ګوټ‌ ګوټ کې تر ۱۳۰ زره ډېرې کورنۍ اوس د څښاک پاکو اوبو او د اقلیمي بدلونونو سره سمون لرونکو اوبو رسولو تأسیساتو ته لاسرسی لري.دا خبر د پنجشنبې په ورځ، د چنګاښ په ۵مه، د ملګرو ملتونو له خوا خپور شوی، چې پکې ویل شوي دغه پرمختګ د «بیړنیو پراختیایي نوښتونو» د پروژې پایله ده، کومه چې د اوبو د بحران د کمولو او بنسټیزې بیارغونې لپاره په ځینو زیان‌منو ولایتونو کې پلي شوې ده.د دې پروګرام له مخې، تر ۸۰ ډېر د اوبه‌لګولو کانالونه او ۱۰ د سیلابونو کنټرول بندونه جوړ یا ترمیم شوي، چې له امله یې شاوخوا ۲۸ زره هکتاره کرنیزه ځمکه د اوبه‌لګولو وړ شوې ده. همداراز، د لمریز پمپونو نصب او د باراني اوبو د زېرمه کولو سیسټمونه د دې پروژې له نوښتونو څخه بلل شوي دي.په قندهار، زابل او ننګرهار ولایتونو کې د کاریزونو بیارغونه او د نوو بنسټیزو جوړېدلو نه یوازې کرنيزې ځمکې بیا را ژوندي کړي، بلکې د خلکو د ژوند معیشت یې ښه کړی، کډوال یې راکم کړي او ټولنې یې د اقلیمي بدلونونو پر وړاندې پیاوړې کړې دي.که څه هم د دې پروګرام رسمي موده پای ته رسېدلې، خو ملګري ملتونه ټینګار کوي چې د دې پروژې سیمې محور او یوپارچه کړنلاره به د نورو پراختیایي فعالیتونو له لارې هم دوام ومومي، څو په افغانستان کې ټول‌پراخ او تلپاتې پرمختګ ته لاره هواره شي.