د روغتیا نړیوال سازمان د افغان کډوالو د ملاتړ لپاره د ۲ میلیونه ډالرو بیړنۍ مرستې غوښتنه کړې ده

د ایران څخه د کډوالو د پراخ ستنېدنې په ترڅ کې، د روغتیا نړیوال سازمان (WHO) د افغانستان په سرحدي سیمو کې د روغتیايي سیستمونو د ړنګېدو په اړه خبرداری ورکړی او د درې میاشتو لپاره د ۲ میلیونه ډالرو د بیړنۍ مالي مرستې غوښتنه یې کړې ده.حنان بلخي، چې د روغتیا نړیوال سازمان د ختیځ مدیترانې لپاره سیمه‌ییز مدیر دی، په خپل اکس کې لیکلي چې د جون په لومړیو دوه اونیو کې له ۷۱ زرو زیات کډوال افغانستان ته ستانه شوي دي چې ۹۱ سلنه یې له ایران څخه راغلي دي.د هغه په وینا، د روغتیا نړیوال سازمان ډلې په سیمه کې شته او د فشارونو سره سره بېړنۍ درملنه، واکسین، د ناروغیو څارنه او رواني ملاتړ وړاندې کوي. خو د پولو روغتیايي مرکزونه له سخت محدود ظرفیت سره مخ دي او بې له بیړنۍ مرستې دغه خدمات دوام نه شي کولی.بلخي ټینګار کړی چې یوازې د دې ۲ میلیونه ډالرو په برابرېدو سره د پولو د روغتیايي خدماتو له بشپړ سقوطه مخنیوی کېدای شي او د زرګونو راستنېدونکو روغتیا او عزت خوندي کېدای شي.نړیوال روغتیا سازمان له نړیوالو بنسټونو، مرسته کوونکو هېوادونو او بشردوستانه شریکانو غوښتي چې په دې بحراني وخت کې دې د افغان راستنېدونکو کډوالو او کوربه ټولنو ملاتړ وکړي.