د ایران لوی څارنوال: ناقانونه بهرني اتباع دې ژر تر ژره ایران پرېږدي

د ایران لوی څارنوال محمد موحدي‌ازاد ویلي چې د دې هېواد لپاره د ناقانونه بهرنیانو شتون د منلو وړ نه دی او باید په لنډ وخت کې له هېواده ووځي.موحدي‌ازاد دا خبرې د شنبې په ورځ (چنګاښ ٧مه) په څرګنده توګه د افغان کډوالو په اړه وکړې او ویې ویل: «د افغانستان وروڼو او خویندو ته چې کلونه مو کوربه‌توب کړی، په کار ده مرسته وکړي چې ناقانونه کسان ووځي، کنه قانوني چلند به ورسره وشي.»هغه ټینګار وکړ چې قانوني مېشت کسان هم باید خبر وي او که څوک د اسرائیل سره همکاري کوي، باید راپور ورکړل شي. د ده په خبره، هغه کسان چې خپله ځانونه معرفی کړي، د قانون له مخې به نرم چلند ورسره وشي.دا څرګندونې په داسې حال کې کېږي چې په وروستیو اونیو کې په ایران کې د افغان کډوالو پر وړاندې فشارونه، نیونې او شړنې ډېرې شوې دي. راپورونه ښيي چې زرګونه افغان کډوال، په تېره هغه چې قانوني اسناد نه لري، د عاجل شړلو له ګواښ سره مخ دي.د بشري حقونو بنسټونه او نړیوالې ادارې څو ځله د افغان کډوالو په وضعیت اندېښنه ښودلې، خو د ایران د چارواکو وروستۍ خبرې ښيي چې د ناقانونه کډوالو د شړلو لړۍ نه یوازې نه ده درېدلې، بلکې نوره هم تېزه شوې ده.