د افغانستان د ښځو او ماشومانو د پياوړتيا او هوساینې موسسه: د ماشومانو ودونه په افغانستان کې دوام لري؛ او نړۍ یې یوازې ننداره کوي

د افغانستان د ښځو او ماشومانو د پياوړتيا او هوساینې موسسه د هلمند ولایت کې د یوه ۴۵ کلن سړي له شپږ کلنې نجلۍ سره د واده په تړاو ویلي چې دا «د ماشومانو پر وړاندې ښکاره جنايت» دی او د نړۍ چوپتیا یې له دې پيښې سره شریکه ګڼلې ده.دغه موسسه په یوه خپره کړې اعلامیه کې دا ډول ودونه «د ماشوم ځورونې، جنسي غلامۍ او د طالبانو تر واک لاندې تنظیم شوې جنايت» بللي دي.موسسه ټينګار کوي چې د قانوني جوړښتونو د نشتوالي، د ملاتړ کوونکو بنسټونو د ړنګېدو او د ښځو د پرېکړه‌ نیولو ډګرونو څخه د بشپړ ایستلو له امله، نجونې د نړۍ د بې‌پامۍ په قیمت قرباني کېږي.دغه موسسه وايي چې د ماشومانو د واده پېښې په ځانګړي ډول په هلمند، کندهار او ارزګان ولایتونو کې ډېرې شوې دي او زیاتوي: «دا یوازې یوه پېښه نه ده، بلکې د زرګونو نجونو ورځنی حقیقت دی چې د داسې رژیم تر واک لاندې ژوند کوي چې ښځه او ماشوم انسان نه، بلکې شتمني ګڼي.»په اعلامیه کې راغلي چې نړیوال بنسټونه او ځواکمن هېوادونه د محتاطې ډيپلوماټيکې ژبې په کارولو، نه یوازې دا پیښې نه دي درولې، بلکې په نالیکلي ډول یې د دوام لپاره مشروعیت برابر کړی دی.موسسه خبرداری ورکوي چې «هره ورځ چې نړۍ چوپ پاتې کېږي، بله ماشومه په زنځیر تړل کېږي.»دا موسسه ټینګار کوي چې د افغان نجونو ژغورنه یوازې د ټولیز اقدام او د نړیوالې ټولنې د رښتینې ارادې په وسیله ممکنه ده. که داسې ونه شي، نو نوې نسل نجونې به د جهل، بې‌وزلۍ او تاوتریخوالي تر سیورې لاندې قرباني کېږي او تاریخ به د نړۍ دا بې‌پروايي هېره نه کړي.