د افغانستان د آزادۍ جبهه: د کډوالو جبري ایستلو د انساني کرامت خلاف او د نړيوالو قوانينو ضد دی

د افغان کډوالو د وضعيت په اړه د اندېښنو له ډېرېدو سره، د افغانستان د آزادۍ جبهې په يوه خبرپاڼه کې د افغان کډوالو د جبري ستنولو او له هغوی سره د ناوړه چلند سخت غندنه کړې ده.دغه جبهې دا اعلاميه د يکشنبې په ورځ (د چنګاښ ٨) خپره کړې او په کې ويلي چې کوربه هېوادونه بايد د بشر حقونو او د کډوالو د نړيوالو کنوانسيونونو ژمنو ته ژمن پاتې شي.په اعلاميه کې ټينګار شوی چې د افغان کډوالو اوسنی وضعيت، په ځانګړې توګه په سيمه‌ييزو هېوادونو کې، د اندېښنې وړ دی او کډوال له تبعيض، خپل‌سري نيونو او جبري ایستلو سره مخ دي.د آزادۍ جبهې په باور، له ۲۰۲۱ کال وروسته د افغانستان سياسي او امنيتي وضعيت داسې دی چې ډېرو کډوالو ته راستنېدل نه يوازې ناشونی، بلکې د هغوی د ژوند لپاره ګواښ دی.دې ډلې له اسلامي هېوادونو او د افغانستان له ګاونډيانو غوښتي چې د خپلو نړيوالو ژمنو تر څنګ، خپلې اخلاقي او ديني دندې هم د کډوالو په وړاندې ترسره کړي.په اعلاميه کې ټينګار شوی چې د هدف مند تاوتريخوالي دوام، د لږه‌کېو ځپل او د حقوقي نظام نشتوالی، افغانستان د کډوالو د راستنېدو لپاره يو ناامن چاپېريال ګرځولی دی.دا څرګندونې په داسې حال کې کېږي چې د ايران چارواکو تازه د افغان کډوالو د ایستلو د شدت خبر ورکړی دی. د ايران لوی څارنوال، محمد موحدي، افغان وګړو ته خبرداری ورکړی چې د ايران خاوره پرېږدي، ګنې قانوني چلند به ورسره وشي.د افغانستان د آزادۍ جبهې په پای کې غوښتنه کړې چې د جبري ستنونو لړۍ دې سمدستي ودريږي او د افغان کډوالو د حقونو د ملاتړ لپاره دې سيمه‌ييز او نړيوال بحثونه پيل شي.