یونیسف: په افغانستان کې میلیونه ماشومان له واکسین څخه بې برخې پاتې دي

د ملګرو ملتونو د ماشومانو ملاتړ صندوق (یونیسف) ويلي چې افغانستان د نړۍ په هغو شلو هېوادونو کې شامل دی چې تر ټولو ډېر نه‌واکسین شوي ماشومان لري.د دې ادارې په وینا، یوازې ۱۶.۲ سلنه افغان ماشومان په بشپړ ډول واکسین شوي دي؛ يو شمېر چې د مخنیوي وړ ناروغیو د خپرېدو خطر ډېر زیاتوي.د یونیسف د راپور له مخې، د ډېرو کورنیو د استوګنځایونو او روغتيايي مرکزونو تر منځ اوږد واټن، د واکسین د ارزښت په اړه د پوهاوي نشتوالی او ناسم معلومات د دې اندېښمن وضعیت اصلي عوامل دي.د واکسین د یوې څانګې یوه کارکوونکي یونیسف ته ويلي: «موږ هره ورځ ګورو چې ډېری ماشومان د خپلو کورنیو د ناپوهۍ له امله د ژوند چانس له لاسه ورکوي.»تر دې ټولو ستونزو سربېره، په افغانستان کې د ماشومانو د ګوزڼ (پولیو) تازه پېښې هم ثبت شوې دي. د روان میلادي کال له پیل راهیسې په بادغیس او هلمند ولایتونو کې دوه مثبتې پېښې ثبت شوې دي، او د روغتیا نړیوال سازمان ویلي چې په کابل، لغمان، ننګرهار او یو شمېر نورو ولایتونو کې د پولیو د چاپېریالي وېروس ۱۸ پېښې موندل شوې دي.افغانستان او پاکستان لا هم د نړۍ یوازیني هېوادونه دي چې د پولیو وېروس يې بشپړ له منځه نه دی وړی.یونیسف خبرداری ورکړی چې که د واکسین تطبیق دوامدار او منظم ترسره نه شي، میلیونه افغان ماشومان په راتلونکو کلونو کې له مخنیوي وړ ناروغیو او مړینې سره مخ کېدای شي.یونیسف وايي که د ۲۰۲۱ څخه تر ۲۰۳۰ پورې د واکسیناسیون پروګرامونه سم تطبیق شي، په افغانستان کې نږدې د پنځو میلیونو انسانانو د مړینې مخنیوی کېدای شي.