له دوغارون پورې هره ورځ اته زره افغان کډوال بېرته هېواد ته ستنېږي

د ایران له لوري د افغان کډوالو د شړلو بهیر په شدت سره روان دی او د تایباد سیمه‌ییزو چارواکو ویلي چې هره ورځ په منځنۍ توګه اته زره ناقانونه افغان وګړي د دوغارون له سرحدي دروازې بېرته افغانستان ته لېږل کېږي.د ایراني رسنیو د راپورونو له مخې، د تایباد ولسوال حسین جمشیدي د افغانستان او ایران په پوله کې د خپل سفر پر مهال ویلي چې له دې کسانو څخه تر ۹۰ سلنې زیات هغه کسان دي چې خپله د بېرته ستنېدو لپاره اقدام کوي.د هغه په وینا، دا کسان یا خو د «خودمعرف» په توګه یا د ښارونو په کچه د چارواکو له خوا پېژندل کېږي او له قانوني پروسې وروسته افغانستان ته ستنېږي.شمیرو ښودلې چې یوازې په تېره یوه اوونۍ کې له دوغارون پولو څخه له ۹۵ زرو زیات افغان اتباع بېرته هېواد ته تللي دي.همدارنګه له ۲۰ زرو ډېر نور کسان په مستقیم ډول دې سرحدي دروازې ته ورغلي څو په قانوني توګه هېواد ته ستانه شي.د تایباد ولسوال ټینګار کړی چې دوغارون د ناقانونه افغان کډوالو د بېرته ستنېدو تر ټولو لویه پوله ګڼل کېږي او هره ورځ شاوخوا ۲۵۰ «ملي بس» موټرې له بېلابېلو ایراني ښارونو دغه کسان د صفر پولې نقطې ته رسوي.تایباد ولسوالي چې شاوخوا ۱۵۱ زره وګړي لري، له مشهد ښار څخه ۲۲۵ کیلومتره سوېل ختیځ کې پرته ده او له افغانستان سره ۹۰ کیلومتره ګډه پوله لري چې له اقتصادي او کډوالي پلوه ځانګړی اهمیت لري.تر دې وړاندې د ایران لوی څارنوال محمد موحدي‌آزاد هم ویلي وو چې ناقانونه بهرني اتباع باید ژر تر ژره ایران پرېږدي. د هغه په وینا، د ناقانونه افغانانو حضور د منلو وړ نه دی او باید په لنډ وخت کې له ایرانه ووځي.