یونیسف: له ایران څخه تر پنځه زرو ډېر بې‌سرپرسته ماشومان افغانستان ته ستانه شوي دي

د ملګرو ملتونو د ماشومانو د ملاتړ صندوق (یونیسف) استازي تاج‌الدین ایواله ویلي چې په جون میاشت کې له اسلام‌قلعه پولې څخه له ۱۶۰ زرو زیات افغان کډوال هېواد ته بېرته ستانه شوي دي؛ چې په وروستیو ورځو کې دا شمېر په ورځني ډول شاوخوا ۲۰ زرو ته رسېږي.ښاغلي ایواله د چنګاښ په ۸مه د خپلې اکس‌پاڼې له لارې ویلي چې د دې لوی شمېر کډوالو په منځ کې د ماشومانو پراخه ونډه د اندېښنې وړ ده؛ داسې چې لږ تر لږه څلورمه برخه یې ماشومان دي او تر پنځه زرو ډېر ماشومان بې‌سرپرسته یا له کورنیو بېل شوي دي.د یونیسف استازي په افغانستان کې خبرداری ورکړی چې د دغو ماشومانو وضعیت، په ځانګړي ډول هغو چې د والدینو له ملتیا پرته بېرته ستنېږي، ډېر بحراني دی او سمدستي پاملرنې ته اړتیا لري.هغه ټینګار کړی چې د یونیسف ډلې او همکاره ادارې یې په اسلام‌قلعه پوله کې په بیړني ډول د ماشومانو او زیان‌منو کورنیو لپاره د روغتیا، تغذیې، رواني ملاتړ، د ماشومانو ساتنې او پاکو اوبو او روغتیايي چاپېریال (WASH) خدمتونه وړاندې کوي.د مرستندویه ادارو د موندنو له مخې، ډېری دغه ماشومان له ستنېدو وروسته د بې‌کورۍ، خوارځواکۍ، رواني زیانونو او د لومړنیو خدمتونو د نشتون له ګواښ سره مخ دي.یونیسف له نړیوالې ټولنې غوښتي چې د مرستې سرچینې ډېرې کړي او د پولې په اوږدو کې د بشري خدمتونو د دوام لپاره ژر او اغېزمنه مرسته وکړي.اسلام‌قلعه چې د افغانستان لوېدیځ کې موقعیت لري، په تېرو اونیو کې له ایران څخه د افغان کډوال د ستنېدو له تر ټولو پراخه دروازو څخه شوې چې پر بشري ادارو یې زیات فشار اچولی دی.