ناروې د افغان راستنېدونکو د ملاتړ لپاره ۱۰ میلیونه کرون بشري مرسته ځانګړې کړه

د ناروې د بهرنیو چارو وزارت ویلي چې د ګاونډیو هېوادونو څخه د افغان کډوالو د ستنېدو د زیاتېدونکي څپې په غبرګون کې یې له خپل بېړني بشري زېرمې څخه ۱۰ میلیونه ناروې کرون (NOK) د ملګرو ملتونو د کډوالو عالي کمېشنرۍ (UNHCR) د پروګرامونو ملاتړ ته ځانګړې کړې ده.دغه وزارت په خپله اېکس پاڼه کې لیکلي چې دغه مالي مرسته به د راستنېدونکو افغانانو د زیاتېدونکو اړتیاوو د پوره کولو لپاره ولګول شي او په پام کې ده چې دا مرسته به په بیړنیو خدمتونو لکه د اوسیدلوځای، څښاک اوبو، روغتیایي پاملرنې او نغدي مرستو کې ولګول شي.د ناروې چارواکو ویلي چې هېواد یې د بشري ناورینونو په مهال د اړمنو خلکو ملاتړ ته ژمن دی او د افغانستان نازک وضعیت، په ځانګړي ډول د ایران او پاکستان څخه راستنېدونکو ښځو او ماشومانو ته بېړنۍ او دوامداره پاملرنه غواړي.د ملګرو ملتونو د راپور له مخې، یوازې په ۲۰۲۵ کال کې تر ۱.۲ میلیونه ډېر افغانان له ایران او پاکستان څخه افغانستان ته ستانه شوي یا په زور ایستل شوي دي، چې دا چاره په هېواد کې بشري وضعیت نور هم خراب کړی دی.د ملګرو ملتونو د اټکل له مخې، دا مهال د افغانستان له نیمايي ډېر خلک په بشري مرستو پورې تړلي دي.د ملګرو ملتونو د کډوالو عالي کمېشنري (UNHCR) د سیمې له هېوادونو غوښتي چې د کډوالو د «داوطلبانه، خوندي او باعزته» ستنېدو اصل رعایت کړي او ټینګار یې کړی چې پر افغان کډوالو د جبري ستنیدو فشار نه یوازې بې ثباته دی، بلکې په سیمه کې د لا ډېرو بې‌ثباتیو لامل کېدای شي.دغه اداره وايي چې اوسمهال د نورو ملګرو ملتونو ادارو او خپلو شریکانو په مرسته راستنېدونکو ته مرستې ورکوي، خو خبرداری ورکوي چې د ۲۰۲۵ کال لپاره د افغانستان د وضعیت د سمبالښت لپاره یوازې ۲۳ سلنه بودیجه برابرې شوې ده.