د خوړو نړیوال پروګرام د افغانستان د وچکالۍ سره د مبارزې لپاره د ملګرو ملتونو د ۱.۷ میلیونه ډالرو بیړنۍ مرستې هرکلی وکړ

د خوړو نړیوال پروګرام (WFP) د ملګرو ملتونو د بیړنیو حالاتو د ځواب مرکزي صندوق (UNCERF) له لوري د ۱.۷ میلیونه ډالرو بیړنۍ مرستې هرکلی کړی چې موخه‌یې د افغانستان په فاریاب ولایت کې د وچکالۍ پر وړاندې مخنیوی کوونکی اقدام دی.د دې ادارې په وینا چې نن دوشنبه، د چنګاښ ۹مه یې راپور خپور کړی؛ دا مرسته به په فاریاب کې شاوخوا ۸ زره کورنیو ته چې د وچکالۍ له امله زیان‌منې دي، دا زمینه برابره کړې چې له خرابېدو وړاندې چمتوالی ونیسي او له سختو او ناامنه د عاید ترلاسه کولو لارو څخه ډډه وکړي.د WFP د طرحې له مخې، هره کورنۍ به ۱۵۰ ډالر ترلاسه کوي او هغه کورنۍ چې ښځینه سرپرست ولري یا په کورنۍ کې د معلول کس شتون ولري، ۳۰ ډالر نور هم ورکول کېږي.اسابل موسار کارلسن، په افغانستان کې د ملګرو ملتونو د بشري مرستو د همغږۍ دفتر (OCHA) مشر ویلي: «له بحراني حالاتو مخکې اقدام، په ځانګړي توګه په داسې شرایطو کې چې د نړۍ او افغانستان د مرستو سرچینې محدودې دي، خورا زیات ارزښت لري. CERF په دې مرسته سره د بشري مخنیوي په برخه کې خپل مشرتوب ښه ثابتاوه.»د وروستیو شمېرو له مخې، د فاریاب د کلیوالو خلکو له درېیمې برخې ډېری اوس مهال له بحراني یا بیړنۍ خوړو نشتوالي سره مخ دي، په داسې حال کې چې په دې ولایت کې وچکالي ورځ تر بلې پراخېږي.جان آیلیف، په افغانستان کې د خوړو نړیوال پروګرام مشر ویلي: «په فاریاب کې هر کروندګر پوهېږي چې وچکالي نوره هم زیاتیږي او راتلونکی حاصلات به زیان وويني. زموږ شمېرې هم همدا ښکاره کوي. له وخته مخکې اقدام نه یوازې د خلکو ژوند ژغوري، بلکې سرچینې هم اغېزمنې کاروي.»د خوړو نړیوال پروګرام له ۲۰۲۲ څخه تر ۲۰۲۴ پورې د CERF له لارې له ۳۳ میلیونه ډالرو ډېرې مرستې ترلاسه کړې او د افغانستان د تر ټولو زیان‌منو خلکو ژوند یې وژغوره.