د کډوالۍ نړيواله اداره: په جون مياشت کې له ايران څخه له ۲۵۶ زرو زيات افغان کډوال راستانه شوي دي

د کډوالۍ نړيوالې ادارې (IOM) له ايران څخه د افغان کډوالو د بې‌سارې ستنېدنې په اړه اندېښنه څرګنده کړې او ويلي يې دي چې د مالي سرچينو نشتوالی د دې بحران د سم ځواب مخه ډب کړې ده.د IOM د وروستيو شمېرو له مخې، يوازې د جون په مياشت کې له ايران څخه له ۲۵۶ زرو زيات افغان کډوال چې ډېری يې د قانوني اسنادو پرته وو، افغانستان ته ستانه شوي دي.د کډوالۍ نړيوالې ادارې عمومي مشرې امي پوپ ويلي دي: «د کډوالو دا اندازه ستنېدل، په ځانګړي ډول له پاکستان څخه د ورته څپې وروسته، پر اوسني کمزوري وضعیت سخت فشار اچولی دی. کورنۍ پرته له څه، يوازې له خپلو جامو سره هېواد ته راګرځي او بېړنۍ مرستې ته اړتيا لري. دا حالت د نړيوالې ټولنې پراخ او عاجل ځواب غواړي، ځکه افغانستان په خپله د دومره ستنېدونکو د سمبالولو توان نه لري.»د IOM د راپور له مخې، دا څپه له هغه وروسته پيل شوه چې د ايران حکومت د مارچ په شلمه نېټه (۲۰ د مارچ) ضرب‌الاجل وټاکه او په جون کې تر ټولو لوړې کچې ته ورسېده. يوازې د جون په ۲۵مه نېټه له ۲۸ زرو زيات کسان د افغانستان له پولو هيواد ته داخل شوي دي.د دې ادارې د شمېرنې له مخې، له ۲۰۲۵ کال د پيل راهيسې له ايران څخه له ۷۱۴ زرو زيات افغان کډوال راستنېدلي چې شاوخوا ۹۹ سلنه يې بې له اسنادو وو او ۷۰ سلنه په زور ايستل شوي دي.IOM خبرداری ورکړی چې د کورنيو په ډله‌ييزه توګه شړل يوه نوې او اندېښمنوونکې بدلون دی، ځکه وړاندې ډېری راستنېدونکي يوازې مجرد نارينه وو.د کډوالۍ نړيوالې ادارې يو ځل بيا ټينګار کړی چې د کډوالو ستنېدل بايد په خپله خوښه، خوندي، له انساني کرامت سره سم او د کوربه ټولنو د ظرفيت په پام کې نيولو سره ترسره شي. دغه اداره له نړيوالې ټولنې غوښتي چې د بشري بحران د لا ژورېدو د مخنيوي لپاره ژر تر ژره مالي ملاتړ او سيمه‌ييزه همغږي برابره کړي.