د نړيوال سره صليب او سرې مياشتې فدراسيون د ايران څخه د افغان راستنېدونکو لپاره د بېړنۍ نړيوالې مرستې غوښتنه وکړه

نړيوال د سره صليب او سرې مياشتې فدراسيون (IFRC) د افغان کډوالو د زياتې راستنېدنې له کبله خپله ژوره اندېښنه څرګنده کړې او له نړيوالې ټولنې څخه يې د بېړنۍ مرستې غوښتنه کړې ده.د IFRC د راپور له مخې، د ۲۰۲۵ کال له پيل راهيسې تر اوسه له ايران څخه تر ۸۰۰ زرو زيات افغانان هېواد ته ستانه شوي دي. يوازې د جون په مياشت کې له اسلام‌قلعه پوله تر ۱۳۷ زرو زيات کسان بېرته افغانستان ته راستانه شوي دي چې ډېری يې ستړي، د خوړو، اوبو او مناسب اوسیدو ځاي پرته راځي.د IFRC د آسيا او ارام سمندر سيمې مشر الکساندر ماتیو د اسلام‌قلعه له پولې د ليدنې پر مهال ويلي: «دا موضوع هغومره جدي نه ده نیول شوې لکه چې پکار وه. دا خلک يوازې شمېرې نه دي، بلکې پلاران، ميندې، ماشومان او کورنۍ دي چې داسې هېواد ته ستنېږي چې خپله له سترو کړکېچونو سره مخ دی. اړينه ده چې له دوی سره د انساني کرامت پر اساس چلند وشي او د ژوند د بيا جوړونې لپاره مرسته وشي.»راپور ښيي چې دغه کورنۍ په ډېره ګرمه هوا (له ۴۰ درجې پورته) کې او له څو شخصي توکو سره پوله اوړي. په ماشومانو کې د خوارځواکۍ نښې ليدل کېږي او ميندې ډېرې ستړې او اندېښمنې دي.د فدراسيون په وينا، هره ورځ لږ تر لږه ۵۰۰ ناروغان چې ښځې، ماشومان او زاړه خلک پکې شامل دي، په ګرځنده کلينيکونو کې معاينه کېږي، خو د درملو او امکاناتو کمښت لا هم لویه ننګونه ده.راپور زياتوي چې ښځې او نجونې له زياتو بندیزونه سره مخ دي. د زده‌کړو، روغتيايي خدمتونو او امنيت ته لږ لاسرسی د دوی زيان‌منونکي نوره هم زياته کړې ده.ماتیو په پای کې خبرداری ورکړی: «د راستنېدونکو په شمېر کې د زياتوالي له امله پر لومړنيو خدمتونو او مرستندويه ادارو فشار ډېر شوی دی. اوس وخت دی چې دولتونه، خيريه بنسټونه او نړيواله ټولنه عملي ګامونه پورته کړي او جدي مرسته وکړي.»نړيوال د سره صليب او سرې مياشتې فدراسيون ټينګار کوي چې د راستنېدونکو کورنيو د ژوند بيا جوړونه مالي سرچينو، بېړنيو مرستو او اوږدمهالو ملاتړونو ته اړتيا لري، څو دوی وکولی شي په هيله او کرامت سره ښه راتلونکی ولري.