ملګرو ملتونو په افغانستان کې د سختې ګرمۍ د څپې خبرداری ورکړ

د ملګرو ملتونو د خوړو او کرنې اداره (فائو) او په افغانستان کې د ملګرو ملتونو د مرستو استازولي دفتر (یوناما) د یوې نوې ګرمې څپې په اړه خبرداری ورکړی چې ټول افغانستان یې پوښلی دی.د یادو ادارو په وینا، دا ګرمۍ د چنګاښ له ۹مې نېټې (۲۹ جون) پیل شوې او تر چنګاښ ۱۴مې (۵ جولای) پورې به دوام وکړي.یوناما ویلي چې د هېواد په ځینو سوېلي، ختیځو او شمالي ولایتونو کې د تودوخې درجه کېدای شي له ۴۵ سانتي‌ګرډه پورته ولاړه شي. وړاندوینې ښيي چې په ډېرو سیمو کې به هوا د عادي اوسط په پرتله ۲ تر ۱۰ درجې ګرمه وي.فائو له خلکو غوښتي چې د ځان او شاوخوا خلکو د خوندي ساتلو لپاره جدي احتیاطي ګامونه واخلي.دا اداره وایي خلک دې کافي اوبه وڅښي، له ناروغانو، زاړه کسانو، حامله ښځو او ماشومانو دې ځانګړې پاملرنه وشي، د ورځې په تودو ساعتونو کې دې له درنو فزیکي کارونو لکه ساختماني او کرنیزو چارو ډډه وشي او څاروي دې په سیوري کې وساتل شي او اوبه دې ورته برابرې شي.نړیوالو ادارو له افغان حکومت او خلکو غوښتنه کړې چې د عامه پوهاوي په زیاتولو سره د ګرمۍ د څپې خطرونه کم کړي او تر ټولو زیان‌منو خلکو ته بېړنۍ مرسته ورسوي.