ملاله یوسفزۍ: د افغان ښځينه لوبغاړو پياوړتيا د طالبانو پر وړاندې د زړورتيا يوه بڼه ده

د نوبل د سولې جايزې ګټونکې او د نجونو د زده‌کړو نړيواله مدافع ملاله یوسفزۍ يو ځل بيا د افغانستان له ښځو ملاتړ څرګند کړی او له نړيوالو ورزشي بنسټونو يې غوښتي چې د افغان ښځينه لوبغاړو ملاتړ دې ډېر کړي.ملاله د CNN سره په ځانګړې مرکه کې ويلي: «کله چې افغان ښځينه لوبغاړو ته د لوبو اجازه ورکول کېږي، دا خپله د طالبانو پر وړاندې د مقاومت يوه بڼه ده.»هغې ټينګار کړی چې د فيفا او د نړيوال کرکټ شورا (ICC) په څېر ادارې بايد دغو ښځو ته د لوبو زمينه برابره کړي او له «ښځو مخالف نظام» سره په زړورتيا ودريږي.د طالبانو د واکمنۍ له بيا پيلېدو وروسته، په تېرو څلورو کلونو کې افغان ښځې له زده‌کړو، کار، ورزش او حتا له پارکونو او سپورتي مرکزونو محرومې شوې دي، چې ملاله او نور د بشر حقونو فعالان دا حالت «جنسیتي اپارتاید» بولي.په راپور کې ويل شوي چې د افغانستان د ښځينه فوټبال ملي لوبډله چې استراليا ته تللې، لا هم د رسمي ملي لوبډلې په توګه نه ده پېژندل شوې. ملاله دوه کاله وړاندې د فوټبال د نړيوال جام په څنډه کې د دغې لوبډلې له غړو سره کتلي وو او اوس له فيفا غواړي چې د دغې لوبډلې ملاتړ لپاره عملي ګامونه واخلي.هغې زياته کړې: «کله چې د ښځو فوټبال په نړيوال جام کې وځلېد او لوبغالي له خلکو ډک وو، د افغانستان يوه لوبډله شته چې لا هم په خپل هېواد کې نه شي لوبېدلی. دا رښتيا زړه ماتوي.»فيفا تېر مياشت د «د افغان ښځو فوټبال لپاره د ګام ستراتيژي» منظور کړې، خو دغه لوبډله لا هم د رسمي ملي ټيم په توګه نه ده پېژندل شوې. له بلې خوا، د نړيوال کرکټ شورا د افغان ښځينه لوبغاړو لپاره د مالي ملاتړ يو صندوق جوړ کړی دی.ملاله ويلي: «موږ له افغانستانه بهر ډېری کارونه کولی شو. هر ځل چې دا ښځې تمرين کوي يا لوبې کوي، په حقيقت کې د طالبانو پر وړاندې په زړورتيا درېږي. دا لوبې يوازې ورزش نه دی، بلکې زړورتيا او مقاومت دی.»هغې په پای کې له نړيوالو ادارو غوښتنه کړې چې د «بهانو» له راوړلو لاس واخلي او ټوله پاملرنه دې د دغو ښځو د ملاتړ او د هغوی د حق بابد ولیدل شي.