خلیلزاد: که ایستلو قانوني هم وي، خو د عملي کېدو طريقه یې انساني نه‌ده

زلمی خلیلزاد، د افغانستان د سولې لپاره د امريکا پخواني استازي، د ايران له خوا د افغان کډوالو په زور ايستل «غيراخلاقي او غيرعادلانه» بللي او د دې کړنې د ژر بياکتنې غوښتنه کړې ده.خلیلزاد په خپل اکس کې لیکلي: «په دې وروستيو ورځو کې د ايران حکومت په زوره زرګونه افغان کډوال ايستلي دي. که څه هم رضا کارانه او قانوني ستنيدل توجيه کېدای شي، خو دا وخت د دې لپاره مناسب نه دی، او که مناسب هم وي، دا ډول بېړه او د افغانستان له چارواکو سره بې همغږۍ تېروتنه ده. زه دا کار غندم.»نوموړي د دواړو هېوادونو د کلتوري او تاریخي تړاوونو يادونه کړې او ويلي یې دي: «افغانان او ايرانان ګاونډيان دي، ورته کلتور لري، ګډ شاعرانه ميراث، ژبه او تاريخ لري او پېړۍ پېړۍ د يو شان امپراتوريو برخه وو.»هغه زياته کړې چې په تېرو ۵۰ کلونو کې ميليونونه افغانان په ايران کې ژوند او کار کړی دی: «ځيني د ايران له خوا سوريې ته د جګړې لپاره لېږل شوي دي. نن په ځينو رسنيو کې افغان کډوالو د اسرایيلو لپاره په جاسوسۍ تورن شوي دي. خو ايا واقعاً دا څومره امکان لري چې يو بې وزلی افغان کډوال دې د ايران د لوړ پوړو امنيتي چارواکو يا هستوي تاسيساتو په اړه موساد ته معلومات ورکړي؟»هغه ټينګار کړی چې که د کوم کس له لوري هم داسې همکاري شوې وي، بايد همغه څوک ونيول شي، نه دا چې زرګونه بې وسه او بې ګناه کډوال له هېواده وشړل شي.خلیلزاد زياته کړې: «ايران د يو خپلواک هېواد په توګه کولی شي چې د کډوالو د ستنولو پرېکړه وکړي، خو دا ستنيدنه بايد منظم، انساني او د افغانستان له اړوندو ادارو سره په همغږۍ کې وي، څو له بشري بحران څخه مخنیوی وشي.»په پای کې نوموړي غوښتنه کړې چې د ايران اسلامي جمهوريت دې د خپل ګاونډي هېواد افغانستان لپاره د بې‌نظم ایستلو پر ځای «د بېرته ستنولو، ټولنې ته د بيا ادغام او د ژوند د بيا رغولو يو پروګرام» برابر کړي؛ يو اقدام چې «د ښو ګاونډيتوب او انساني خواخوږۍ نښه» به وي.