فرشته حسيني د کډوالو پر وړاندې د تاوتريخوالي د پای غوښتنه وکړه

فرشته حسيني، د ايران د سينما افغان‌تباره لوبغاړې، د افغان کډوالو پر وړاندې د فشارونو له زياتېدو سره، په خپل انسټاګرام کې د يوه پيغام په خپرولو سره غوښتنه کړې چې بې‌ګناه خلکو ته غوصه او نفرت مه اړوئ.هغې ليکلي: «خپله غوصه او کرکه پر بې‌ګناه او بې‌تقصيره خلکو مه وباسئ. هېڅ ملت دا حق نه لري چې په زور زياتي او تياره کې ژوند وکړي.»د هغې دا خبرې په مجازي نړۍ کې پراخه غبرګونونه راوپارول او ډېرو خلکو د کډوالو سره د هغې د خواخوږۍ ستاينه وکړه. حسيني تل په خپلو هنري اثارو او مرکونو کې د ايران خلکو او افغان کډوالو تر منځ د سوله‌ييز ګډ ژوند او متقابل احترام ټينګار کړی دی.په همدې وخت کې نويد محمدزاده، د ايران مشهور لوبغاړی او د فرشته حسيني مېړه، يو اعتراضي ويډيو خپره کړې او د خپلې مېرمنې د پلار د نيول کېدو له امله له امنيتي ځواکونو سخته نيوکه کړې ده.هغه ويلي: «د مېرمنې پلار مې ۳۰ کاله کېږي چې په قانوني توګه په ايران کې ژوند کوي او دا نيونه هېڅ انساني او قانوني توجيه نه لري.»محمدزاده له چارواکو غوښتنه کړې چې ژر تر ژره د هغه د خوشې کولو زمينه برابره کړي او له هغو کډوالو سره چې د هېواد په جوړښت او پرمختګ کې يې کلونه رول لوبولی دی، په درناوي او عدالت چلند وشي.د دغو دواړو پېژندل شوو هنرمندانو دا غبرګون د کډوالو د ستونزمن وضعيت پر لور د خلکو پام راواړاوه او يو ځل بيا يې د کډوالو په اړه د پخوانيو کړنو او پاليسيو د بياکتنې اړتيا ياده کړه.