د افغان فعالو ښځو د همغږۍ بنسټ: له ایرانه دې د افغان کډوالو جبري ایستل ودرول شي

د افغان فعالو ښځو د همغږۍ بنسټ په یوه رسمي اعلامیه کې له ایران څخه د افغان کډوالو د زور ایستنې د زیاتېدو په اړه خپله ژوره اندېښنه څرګنده کړې ده.په دې اعلامیه کې چې د ایران حکومت ته استول شوې، ویل شوي چې دغه بنسټ په ټوله نړۍ کې د ۸۰۰۰ زیاتې افغان فعالې ښځې استازولي کوي چې تر ۴۰۰ ډېرې یې په ایران کې مېشتې دي. دې بنسټ ټینګار کړی چې د هغو افغان کډوالو ایستل چې د ګواښ، زورزياتي او مرګ له وېرې له هېواده وتلي، د نړیوالو بشري حقونو له اساسي اصولو، په ځانګړي ډول د ۱۹۵۱ ژنیو کنوانسیون د اجباري نه ستنېدنې اصل سره په ټکر کې دي.دغه بنسټ د ایران د خلکو او حکومت د اوږدمهالې مېلمه پالنې مننه کړې خو خبرداری یې ورکړی چې د ایستنو دوام به لوی بشري کړکېچ رامنځته کړي.په اعلامیه کې غوښتنه شوې چې ایران دې ټول روان او پلان شوي د کډوالو ایستنې، په ځانګړي ډول د زیان منونکو کسانو، ژر تر ژره ودروي او له نړیوالو ادارو سره دې د انساني، قانوني او پایدارو حللارو په موندلو کې همکاري وکړي.دغه راز له نړیوالو د بشري حقونو ادارو، ملګرو ملتونو او نورو خیریه سازمانونو غوښتنه شوې چې په ایران کې له ګواښ سره مخ افغانان وپيژني، مستند یې کړي او ژر تر ژره ملاتړ وکړي.دغه بنسټ په پای کې خپله چمتووالي ښودلی چې د خبرو، سیمه‌ییزې همکارۍ او د افغان کډوالو د ملاتړ د میکانېزمونو په پیاوړتیا کې فعاله ونډه واخلي.