۴۳ زره افغانان په یوه ورځ کې له ایرانه هېواد ته ستانه شوي

د ملګرو ملتونو د کډوالو عالي کمېشنرۍ (UNHCR) ویلي چې یوازې د جولای په لومړۍ نېټه له ایرانه تر ۴۳ زرو ډېر کسان افغانستان ته ستانه شوي دي؛ دا شمېر تر اوسه بې‌سارې دی او د پولو په وضعیت کې د بشري کړکېچ اندېښنې زیاتې کړې دي.دې ادارې ویلي چې له ایران څخه ستنېدنې د جون له ۱۳ نېټې وروسته په چټکۍ زیاتې شوې دي، په داسې حال کې چې د روان میلادي کال په لومړیو شپږو میاشتو کې د ورځنۍ ستنېدنې منځنی شمېر یوازې ۵ زره تنه و.د دې ادارې د معلوماتو له مخې، له روان کال راهیسې تر دې دمه له ۱.۴ میلیونه ډېر کسان افغانستان ته ستانه شوي یا پر ستنېدلو مجبور شوي دي چې له دې ډلې څخه تر یو میلیون ډېر یوازې له ایرانه راغلي دي. له پاکستانه هم یوازې د اپریل په میاشت کې شاوخوا ۱۵۰ زره تنه ستانه شوي دي.دا اداره خبرداری ورکوي چې په پولو کې یې امکانات د سخت فشار لاندې دي او کارکوونکي هره ورځ له ستړو، وږو او وېرېدلو خلکو سره مخ دي چې هڅه کوي د لومړنیو مرستو وېش، ګرمو خوړو او بېړنیو نغدي پیسو په ورکړه سره مرسته ورسره وکړي.کمیسارۍ ویلي که څه هم د پولو لپاره نور کارکوونکي ګمارل شوي دي، خو که دغه بهیر په همدې ډول دوام وکړي او بېړنۍ مرسته ورسره و نه شي، یوازې د څو اونیو لپاره به د مرستو وړتیا ولري.دغه اداره خبرداری ورکوي چې ډېری ستنېدنې په ستونزمنو حالاتو کې او د خلکو د خوښې خلاف کېږي. ډېری ستنېدونکي وایي چې د خپلو هېوادوالو د ایستلو په لیدو اړ شول چې خپله هم هېواد ته ستانه شي.په همدې حال کې د ستنېدونکو سره د تبعیض، ځورونې او جدي بندیزونه راپورونه هم خپاره شوي دي.ملګري ملتونه وایي د سیمې کوربه هېوادونو د افغانانو د وتلو لپاره ضرب‌الاجلونه ټاکلي چې دا کار د کډوالو وضعیت نور هم کړکېچن کړی دی. په داسې حال کې چې افغانستان خپله له ګڼو کړکېچونو سره مخ دی، دغه ستنېدنې کولی شي بشري او امنیتي ستونزې نورې هم ډېرې کړي.کمیسارۍ له سیمه‌ییزو هېوادونو غوښتي چې د ستنېدنې په بهیر کې دې د رضاکارانه توب، امنیت او انساني کرامت اصل ته درناوی وکړي او له جبري ایستنې دې ډډه وکړي.په پای کې، UNHCR له نړیوالې ټولنې غوښتنه کړې چې بېړنۍ او پراخې مالي مرستې برابرې کړي. دغه اداره د ستنېدونکو اړتیاوو د پوره کولو لپاره ۲۱۶ میلیونه ډالر ته اړتیا لري، خو تر اوسه یوازې ۲۸ سلنه بودجه ورته برابره شوې ده.کمیسارۍ وایي په دې حساس وخت کې د افغانستان خلک د نړۍ له ملاتړ پرته د ثبات، هیله او ښه راتلونکي هیله نشي لرلای.