ملګرو ملتونو په ایران کې د افغانانو او لږکیو د پراخو نیونو په اړه خبرداری ورکړ

د ملګرو ملتونو ځانګړو راپور ورکوونکو د ایران له خوا د افغان کډوالو او قومي ـ مذهبي لږکیو د پراخو نیونو په اړه خپله ژوره اندېښنه څرګنده کړې او له ایراني چارواکو یې غوښتي چې د خلکو پر ځپلو سربېره دې د هغوی حقونه خوندي کړي.ریچارډ بېنټ، د ملګرو ملتونو د بشري حقونو ځانګړي راپور ورکوونکو په خپله اېکس پاڼه کې لیکلي چې د وروستیو نښتو له پیل راهیسې، سلګونه تنه، په ځانګړي ډول افغان اتباع، کردان، بلوڅان، بهاییان او اهوازي عربان د «جاسوسۍ» یا له «بهرنیو دولتونو سره د همکارۍ» په تور نیول شوي دي.د ډېرو نیول شویو کسانو لپاره د وکیل ته لاسرسی یا عادلانه محاکمه نشته او هغوی له اعدام یا ورک کېدو سره مخ دي.ملګرو ملتونو کارپوهانو خبرداری ورکړی چې دغه نیونې د اوربند وروسته د پراخ ځپلو برخه ده او افغانان په ځانګړې توګه د ډله‌ییز ایستلو او ناوړه چلند له ګواښ سره مخ دي.یوازې د جون په میاشت کې له ایرانه له ۲۵۶ زرو ډېرو افغان کډوالو ایستل شوي دي؛ په داسې حال کې چې د جبري ستنېدنې او د «بې ستنېدنې اصل» د نقض په اړه اندېښنې زیاتې شوې دي.په همدې حال کې راپورونه خپاره شوي چې د ایران په دولتي رسنیو کې د افغانانو او لږکیو پر ضد د کرکې خپرونه روانه ده او هغوی په سپکو ټکو لکه «چټل موږکان» او «خاین» یاد شوي دي. د ملګرو ملتونو د کارپوهانو په باور، دا ډول تبليغات د تاوتریخوالي او د بشري حقونو د درنو سرغړونو لپاره زمینه برابروي.راپور ورکوونکو ټینګار کړی چې د ایران د حکومت چلند له خپلو خلکو سره، په ځانګړې توګه د کړکېچونو وروسته، د دې هېواد د بشري حقونو او عدالت د اصولو د مراعات یوه اړینه ازموینه ده.