د افغانستان مدني او د بشري حقونو بنسټونو د روسیې له پرېکړې سره چې غواړي طالبان په رسمیت وپېژني، اعتراض کړی دی

یو شمېر د افغانستان مدني بنسټونو، اعتراضي غورځنګونو او د بشري حقونو سازمانونو په یوه ګډه اعلامیه کې د روسیې فدراسیون وروستۍ پرېکړه چې غواړي د طالبانو ډله د افغانستان د رسمي واکمنۍ په توګه په رسمیت وپېژني، په کلکه غندلې ده.په دې اعلامیه کې چې د روسیې دولت او نړیوالې دیپلوماتیکې ټولنې ته په خطاب خپره شوې، راغلي چې دا ډول پرېکړه نه یوازې له بنسټیزو بشري حقونو او د ملګرو ملتونو له منشور سره په ټکر کې ده، بلکې د میلیونونو افغان وګړو په تېره د ښځو، لږکیو، پخوانیو امنیتي ځواکونو، خبریالانو او مدني فعالانو د کړاو ښکاره سپکاوی دی.د دې اعلامیې لاسلیک کوونکي ټینګار کوي چې طالبان د افغانستان د خلکو مشروع استازیتوب نه لري او د زور او تاوتریخوالي له لارې، پرته له هر ډول قانوني یا ټاکنیز بهیره واک ته رسېدلي دي. دوی خبرداری ورکړی چې د دې ډلې په رسمیت پېژندنه، پرته له بشري مخکې‌شرطونو، تاوتریخوالي، تبعیض او سیستماتیک ځپلو ته مشروعیت ورکوي.په اعلامیه کې ویل شوي چې د طالبانو تر واک لاندې ښځې او نجونې له خپلو بنسټیزو حقونو څخه په بشپړ ډول بې‌برخې شوې دي، پخواني پوځیان او دولتي کارکوونکي د نیونې، شکنجې او اعدام له ګواښ سره مخ دي، آزادې رسنۍ له منځه تللي او مدني فضا په پراخه کچه ځپل شوې ده.د افغانستان مدني بنسټونو خبرداری ورکړی چې د روسیې پرېکړه کولی شي نور هېوادونه هم دې ته وهڅوي چې له طالبانو سره اړیکې عادي کړي پرته له دې چې د ځواب‌ ویلو غوښتنه وکړي؛ دا به د افغان کډوالو د ایستلو بهیر ته لاره هواره کړي او د خلکو باور پر نړیوالو بشري حقونو سخت زیانمن کړي.همدارنګه، دغه اعلامیه له روسیې غوښتنه کوي چې په خپله پرېکړه دې بیا کتنه وکړي، د طالبانو د قربانیانو غږ دې په رسمیت وپېژني او د بشري حقونو د ناقضینو پر ملاتړ کولو دې پر ځای د افغانستان د سولې او رښتیني عدالت لپاره هڅې وکړي.مدني بنسټونو همدارنګه له نړیوالې ټولنې، د ملګرو ملتونو، اروپايي ټولنې او د سیمې له دولتونو غوښتي چې په پیاوړي او روښانه دریځ سره د طالبانو مشروعیت‌ بخښلو مخه ونیسي او د افغانستان د خلکو تر څنګ ودرېږي.