روسیې د طالبانو په رسمیت پېژندلو سره د جنسیتي اپارتاید ملاتړ وکړ

د افغانستان د ښځو او ماشومانو د رفاه موسسې د روسیې د حکومت وروستۍ پرېکړه چې غواړي طالبان په رسمي توګه په رسمیت وپېژني، په کلکه غندلې ده او دا یې د جنسیتي اپارتاید ښکاره شراکت او د افغان ښځو سره ستره جفا بللې ده.په دې موسسه کې په خپره شوې رسمي اعلامیه کې راغلي چې د مسکو دا پرېکړه نه یوازې د عدالت او بشري حقونو له اصولو ښکاره سرغړونه ده، بلکې د سیاسي ګټو لپاره د سولې او نړیوال امنیت پر وړاندې یو سنجول شوی او منظم ګواښ دی.دې موسسې خبرداری ورکړی چې یوې داسې ډلې ته مشروعیت ورکول چې د هغې واکمني پر ځپلو، تبعیض او د ښځو او لږکیو په حذف ولاړه ده، افغانستان د سیمې او نړۍ لپاره په یوه «مهالوېش لرونکې بم» بدلوي. د روسیې دا ادعا چې ګواکې طالبان د ترهګرۍ پر ضد مبارزه کوي، «بې‌اساس او له هر ډول اخلاقي اعتباره خالي» بلل شوې ده.د ښځو او ماشومانو د رفاه موسسه ټینګار کوي چې دا پرېکړه نه یوازې د افغانستان د خلکو له ملي ګټو سره په ټکر کې ده، بلکې د بشري حقونو پراخې او سیستماتیکې سرغړونې، په ځانګړي ډول د ښځو، زیان‌منو قومونو او مذهبي لږکیو د حقونو د نقض ملاتړ دی.په دې اعلامیه کې غوښتنه شوې چې دا اقدام دې د ملګرو ملتونو د عمومي اسامبلې له لارې د «سولې لپاره یوالي» پرېکړه‌لیک له مخې په پراخه توګه وڅېړل شي او روسیه دې په نړیواله کچه ځواب‌ ویونکې شي.همدارنګه وړاندیز شوی چې د ملګرو ملتونو په ځینو مهمو سازمانونو کې د روسیې غړیتوب دې د دې سازمان د منشور د نقض له امله وڅېړل شي.دغه موسسه په پای کې ټینګار کوي چې «د افغانستان د ښځو غږ د کمزورۍ چیغې نه دي، بلکې د خبرداري او اعتراض ناره ده». له ټولو فیمینسټي غورځنګونو او د بشري حقونو له مدافعینو په ټوله نړۍ، په ځانګړي ډول په روسیه کې غوښتنه شوې چې په دې بې‌عدالتیو کې دې چوپ پاتې نه شي او اجازه دې ورنه کړي چې د افغانستان ښځې د جیوپولیتیکي لوبو او چوپ مصلحتونو قرباني شي.