له ۷۵ زرو زیات افغان کډوال د سیستان او بلوچستان له پولې افغانستان ته ستانه شوي دي

د ایران د اسلامي جمهوریت د سیستان او بلوچستان والي ویلي چې په تېرو دوو اونیو کې له ۷۵ زرو زیات ناقانونه افغان وګړي د میلَک له لارې بېرته افغانستان ته ستانه شوي دي.منصور بیجار، چې د دې ولایت والي دی، دا څرګندونې د دوشنبې په ورځ (۱۶ چنګاښ) د زاهدان په الغدیر کمپ کې د خپلې لیدنې پر مهال وکړې. ده وویل چې په دې کسانو کې ۷۵ سلنه په خپله خوښه د ستنېدو لپاره کمپ ته ورغلي او پاتې ۲۵ سلنه له نورو ولایتونو څخه ټول او دې کمپ ته لیږدول شوي دي.د هغه په خبره، د افغانستان له ایران سره د اوږدې پولې له امله ټول ناقانونه مېشت افغان اتباع باید یا د سیستان او بلوچستان له میلَک پوله او یا د خراسان رضوي له دوغارون پوله ایران پرېږدي.د سیستان او بلوچستان والي وویل چې د ستنېدونکو شمېر ډېر زیات شوی دی: «په ځینو ورځو کې تر ۱۴ زرو کسانو پورې کمپ ته ورغلي دي. له همدې امله ټولو خدمت‌رسو ادارو خپل فعالیتونه ډېر کړي دي او تر دې د امام رضا د زایرسرای له ظرفیت څخه هم د خدمتونو لپاره ګټه اخیستل شوې ده.»د منصور بیجار په وینا، د میلَک له لارې پاکستان ته د تلو لپاره بدیل لاره هم په پام کې نیول شوې چې د ستنېدو بهیر اسانه شي.هغه په دوام کې وویل چې د ستنېدونکو د ډېرښت له امله کېدای شي د پولې په هغې غاړه کې د افغانستان اړوند ادارو خدمتونه له خنډ سره مخ شي، خو ایران چمتو دی چې له افغان چارواکو سره د خدمتونو د ښه والي په برخه کې همکاري وکړي.