فایق: افغانستان د طالبانو له بیا واکمنېدو وروسته د هر اړخیز سقوط پر لور روان دی

نصیراحمد فایق، چې د افغانستان دایمي استازی په ملګرو ملتونو کې دی، خبرداری ورکړی چې افغانستان د طالبانو له واک ته رسېدو وروسته په ټولو برخو کې له ژور شاتګ سره مخ شوی دی.فایق د دوشنبې په ماښام (۱۶ چنګاښ) د ملګرو ملتونو په عمومي غونډه کې د افغانستان د وضعیت په اړه خبرې وکړې.هغه وویل چې د طالبانو واکمني هېواد د نړۍ د تر ټولو بد بشري او بشردوستانه کړکېچ پر لور سوق کړی او د پرمختګ او ثبات هره فرصت یې له منځه وړی دی.د هغه په وینا، د ښځو او نجونو له زده‌کړې او ټولنیزې ونډې سیسټماټيک محرومول نه یوازې د بشري حقونو ښکاره نقض دی، بلکې یوه ستراتیژیکه فاجعه ده چې د افغانستان د ثبات او امنیت بنسټونه کمزوري کوي.فایق زیاته کړه چې د طالبانو سیاستونه پر ټولنه د تبعیض، زورزياتۍ او حذف پر بنسټ ولاړ دي.هغه په ځانګړي ډول د زده‌کړې، کار، بیان د آزادۍ او د ښځو له ټولنیز ژوند څخه بشپړ حذف یاد کړ او دا یې د انساني کرامت قصدي نقض وباله.د افغانستان استازي له ملګرو ملتونو او غړو هېوادونو وغوښتل چې د طالبانو د جنسیتي آپارتاید پر وړاندې روښانه دریځ ولري او د افغانستان د خلکو، په ځانګړي ډول د ښځو او نجونو، د حقونو د خوندیتوب لپاره عملي ګامونه پورته کړي. فایق ټینګار وکړ چې د طالبانو حکومت د افغانستان د خلکو مشروع استازیتوب نه لري او د هېواد د راتلونکي لپاره هر ډول دوامداره حل باید د خلکو پر ارادې او د ټولنې د ټولو قشرونو پر برخې اخیستنې ولاړ وي.