نړیوالې جزایي محکمې د هبت‌الله اخندزاده او عبدالحکیم حقاني د نیولو حکم ورکړ

د نړیوالې جزایي محکمې (ICC) نن سه‌شنبه (۱۷ د چنګاښ) د طالبانو د مشر هبت‌الله اخندزاده او د دې ډلې د قضایي نظام د مشر عبدالحکیم حقاني د نیولو حکم صادر کړ.دا حکمونه د ښځو او نجونو پر وړاندې د سیستماتیک او جنسیتي ځورونې په اړه د شکایتونو او اسنادو تر څېړلو وروسته ورکړل شوي دي.د محکمې لوی څارنوال کریم خان په یوه خپره شوې خبرپاڼه کې ویلي چې دا دواړه مشران د ۲۰۲۱ کال د اګست له بیا واکمنېدو وروسته د بشري حقونو د پراخ او پلان شوي نقض له امله تر قانوني څار لاندې راغلي دي.په تورونو کې د ښځو او نجونو د زدکړې، کار، تګ راتګ، د نظر څرګندونې او ټولنیز او سیاسي ګډون حق اخیستل شامل دي.محکمې ویلي چې طالبانو د ظالمانه قضایي جوړښتونو په رامنځته کولو او د سختو جنسیتي پالیسیو په پلي کولو سره د افغانستان د نفوس نیمايي برخه په قصدي توګه د ظلم او زورزیاتي لاندې راوستې ده چې دا کار د نړیوالو بشردوستانه قوانینو ښکاره نقض ګڼل کېږي.کریم خان ټینګار کړی دی: «هیڅوک د قانون څخه لوړ نه دي. هغه کسان چې د ښځو او نجونو بنسټیز حقونه اخیستي، باید عدالت ته ځواب ووایي.»دا لومړی ځل دی چې د طالبانو لوړپوړي مشران په رسمي ډول او په نړیواله کچه د بشریت ضد جرمونو په تور تورن کېږي.که څه هم افغانستان له ۲۰۱۶ کال راهیسې د نړیوالې جزایي محکمې غړیتوب لري، خو د دغو حکمونو عملي کېدل د نورو غړو هېوادونو له همکارۍ پرته ناشوني دي. تر اوسه طالبانو په دې اړه کوم رسمي غبرګون نه دی ښودلی.