د جنیوا کې د افغانستان استازولي: طالبان نه شي کولی افغانستان له نړیوالې جزایي محکمې څخه وباسي

د نړیوالې جزایي محکمې لخوا د طالبانو د مشر او د دې ډلې د سترې محکمې د مشر د نیولو د حکم تر صادرېدو وروسته، د افغانستان استازولي په جنیوا کې خبرداری ورکړی چې طالبان په قانوني ډول نه شي کولی د افغانستان غړیتوب په دې محکمه کې لغوه کړي.دې استازولي نن چهارشنبه، د چنګاښ په ۱۸مه په خپل ایکس کې په خپاره شوي پیغام کې ویلي چې افغانستان د ۲۰۰۳ کال د فبرورۍ په ۱۰مه د روم له اساسنامې سره په یوځای کېدو سره د نړیوالې جزایي محکمې (ICC) صلاحیت په رسمي ډول منلی دی. دا غړیتوب محکمې ته اجازه ورکوي چې ټول هغه جنایتونه چې له می ۲۰۰۳ وروسته په افغانستان کې یا د افغان اتباعو له خوا ترسره شوي، وڅېړي او عدلي تعقیب یې وکړي.د دې استازولۍ په وینا، طالبان کولای شي د نیولو حکم له پامه وغورځوي، خو له نړیوالو حقوقو سره سم نه شي کولی افغانستان د دې محکمې له غړیتوبه وباسي.دا دریځ وروسته له هغې څرګندېږي چې طالبانو ویلي دي دوی له روم اساسنامې سره هېڅ ژمنتیا نه لري او دا محکمه نه مني.د طالبانو د دې دریځ په ځواب کې د افغانستان استازولي ټینګار کړی دی: «یوازینۍ لاره چې د قانوني تعقیب مخه نیولی شي، دا ده چې ثابت شي د دې جنایتونو عاملین د افغانستان اتباع نه دي.»تیره ورځ نړیوالې جزایي محکمې د «د بشریت پر ضد جنایت» په تور د طالبانو د مشر هبت‌الله اخندزاده او د دې ډلې د سترې محکمې د مشر عبدالحکیم حقاني د نیولو حکم صادر کړ.په ځواب کې د طالبانو ویاند، ذبیح‌الله مجاهد وویل: «موږ هېڅ داسې اداره په رسمیت نه پېژنو چې نړیواله جزایي محکمه بلل کېږي او هېڅ ژمنتیا ورته نه لرو.»سره له دې، د بشر حقونو سازمانونو لکه د بشر حقونو څار ډلې د دې حکم هرکلی کړی او دا یې د قربانیانو لپاره د عدالت د تامین په لار کې یو مهم ګام بللی دی.