ایراني چارواکی: له سیستان او بلوچستانه تر ۹۱ زرو ډېر ناقانونه کډوال افغانستان ته ستانه شوي

د ایران د سیستان او بلوچستان ولایت د کډوالو چارو دفتر وايي چې په تېرو دوه اونیو کې له ۹۱ زرو ډېر ناقانونه افغان کډوال د میلک له پوله افغانستان ته ستانه شوي دي.د ایراني رسنیو د راپورونو له مخې، د دې ادارې سرپرست هوشنګ بامري د ولایت د عمومي څارنوالۍ د عامه حقونو د مرستیال د لیدنې په مهال ویلي چې د دغو کسانو ۷۵ سلنه په خپله خوښه د بېرته ستنېدو لپاره ځانونه ورپیژندلي دي.نوموړي زیاته کړه چې د کډوالو د ستنېدو بهیر د چنګاښ له پیل راهیسې زور اخیستی او دا مهال د میلک پوله په ۲۴ ساعته ډول د تګ راتګ لپاره خلاصه ده.د هغه په وینا، یوازې د چنګاښ په ۱۷مه نېټه شاوخوا ۴۶۰۰ کډوال د زاهدان له الغدیر کمپ څخه میلک پولې ته لېږدول شوي او په ټوله کې نږدې ۹۳۰۰ تنه په همدې ورځ افغانستان ته ستانه شوي دي.کډوال تر ستنېدو مخکې په زاهدان کې د الغدیر کمپ، په نیمروز کې د ادیمي کمپ او په زابل کې د میلک کمپ کې ساتل کېږي څو اداري چارې یې بشپړې شي او بیا افغانستان ته ولېږدول شي.هوشنګ بامري همداراز ویلي چې د بېرته ستنېدو د عملیاتو په اوج کې هره ورځ تر ۲۰۰ پورې بسونه د زاهدان څخه تر میلک پورې د کډوالو د لېږد چارې سمبالوي او په اوسط ډول هره ورځ نږدې ۷ زره کسان د دې ولایت له پولو وځي.دا په داسې حال کې ده چې په ایران کې د ناقانونه کډوالو د داوطلبانه بېرته ستنېدو لپاره ټاکل شوې نېټه له وري میاشتې څخه تر د چنګاښ ۱۵مې پورې ټاکل شوې وه.