په بدخشان کې د موټر چپه کېدو پېښه د زوم او ناوې په ګډون د یوې کورنۍ پنځه غړي ووژل

د بدخشان ولایت په تشکان ولسوالۍ کې د یوه موټر د چپه کېدو له امله د یوې کورنۍ پنځه غړي، چې پکې زوم او ناوې هم شامل دي، ژوند له لاسه ورکړی او یو کس ټپي شوی دی.د طالبانو د بدخشان د امنیې قوماندانۍ ویاند احسان‌الله کامګار وایي، دغه پېښه د پنجشنبې په ورځ (۱۹ د چنګاښ) د تشکان کشم پر لاره د تشکان پول په سیمه کې رامنځته شوې ده.د کرولا ډوله موټر، چې نوی واده شوي زوم او ناوې یې له خپلو ځینو کورنیو غړو سره لېږدول، له سړکه اوښتی او چپه شوی دی.په دې پېښه کې ناوې، زوم، یو ماشوم او د کورنۍ دوه نور غړي مړه شوي دي. همداراز یو بل ټپي کس په نازک حالت کې روغتون ته لېږدول شوی دی.که څه هم د پېښې کره لامل تر اوسه څرګند نه دی، خو ویل کېږي چې زیات سرعت، خوندي نه لارې او د موټر چلوونکي بې‌احتیاطي یې احتمالي لاملونه دي.