د افغان کډوالو د راستنېدو کچه له ایران څخه لوړه شوې؛ ملګري ملتونه د پراخ ځواب غوښتنه کوي

په تېرو اوونیو کې له ایران څخه د افغان کډوالو راستنېدل په څرګند ډول ډېر شوي دي.د ملګرو ملتونو د نفوسو صندوق (UNFPA) د بارداره ښځو او ماشومانو د خراب حالت له امله اندېښنه ښودلې او د عاجل او پراخ اقدام غوښتنه یې کړې ده.په افغانستان کې د دې ادارې استازي کوابِنا آساموا نِه په خپله اکس پاڼه کې ویلي چې ډېرې راستنېدلې ښځې بارداره دي او ماشومان او تنکي ځوانان له رواني فشارونو او ګډوډۍ سره مخ دي.نوموړي ټینګار کړی چې دې خلکو ته باید بېړنۍ روغتیايي خدمتونه، په ځانګړي ډول د امیندوارۍ پاملرنه او رواني-ټولنیزه مرسته برابر شي.دې ادارې له ټولو همکارو بنسټونو او نړیوالې ټولنې غوښتي چې د موجود بحران په وړاندې یو ګډ او اغېزمن ځواب وړاندې کړي، په ځانګړي ډول د ښځو او ماشومانو د وضعیت د ښه والي لپاره.په ورته وخت کې، د اسلام‌قلعه له پوله راپورونه ښيي چې ډېری کورنۍ پرته له لومړنیو خدمتونو په سخت حالت کې ژوند کوي.