د مدني ټولنې او جلاوطنۍ خبریالانو د ملاتړ سازمان: د زهرا شمس نیول د خبریالۍ او عدالت غوښتنې له امله د اندېښنې وړ دي

د مدني ټولنې او جلاوطنۍ خبریالانو د ملاتړ سازمان په یوه اعلامیه کې په پاکستان کې د افغان خبریالې زهرا شمس نیول په کلکه غندلي او د دې هېواد له حکومته یې غوښتي چې د افغان خبریالانو او مدني فعالانو د نیولو او ایستلو لړۍ ژر تر ژره ودروي.په اعلامیه کې ویل شوي چې زهرا شمس د خپلو رسنیزو او عدالت غوښتونکو هڅو له امله د خپلې کورنۍ سره یو ځای د پاکستان پولیسو نیولې او د کډوالو یوه کمپ ته لېږدول شوې ده.سازمان ټینګار کړی چې د زهرا شمس نیول او د ایستلو ګواښ هغه سرکوب‌کوونکې کړنې دي چې په وروستیو کلونو کې د جلاوطنه افغان خبریالانو پر وړاندې زیاتې شوې دي.په اعلامیه کې لیکل شوي: «خبریالي او د عدالت غږ پورته کول هېڅ جرم نه دی. موږ له پاکستاني حکومت غوښتنه کوو چې د افغان کډوالو، په ځانګړې توګه خبریالانو او مدني فعالانو، د ایستلو لړۍ سمدستي ودروي او خپلو نړیوالو ژمنو ته وفادار پاتې شي.»دغه سازمان له نړیوالو بنسټونو، نړیوالې ټولنې او ملګرو ملتونو غوښتنه کړې چې په پاکستان کې د افغان کډوالو د حقونو ښکاره نقض په وړاندې چوپ پاتې نه شي او د جلاوطنۍ خبریالانو او مدني فعالانو د خوندیتوب لپاره عملي ګامونه واخلي.زهرا شمس یوازې یوه له لسګونو هغو افغان خبریالانو ده چې په وروستیو میاشتو کې په پاکستان کې د نیول کېدو او ایستلو له خطر سره مخ شوې ده. له دې وړاندې هم د پاکستان پولیسو څو ځله افغان خبریالان نیولي، ګواښلي او ایستلي دي.