د کډوالو د حقونو څار: د افغان ښځو د کډوالۍ دوسیو د ژر بیا پیل غوښتنه وکړه

د کډوالو د حقونو د څار سازمان په خپل وروستي بیان کې د پاکستان کې د افغان ښځو د کډوالۍ دوسیو د څېړنې د ځنډېدو له امله ژوره اندېښنه ښودلې او د امریکا له حکومت څخه یې غوښتي چې د P-1 او P-2 په نوم د لومړیتوب لرونکي کډوالۍ پروګرامونه ژر تر ژره بیا پیل کړي.په بیان کې ویل شوي چې دا ښځې د طالبانو له واکمنېدو وروسته په ۲۰۲۱ کال کې پاکستان ته تښتېدلې دي او اوس له درې کلونو راهیسې په یوه ناڅرګند حقوقي وضعیت کې ژوند کوي.ډېرې یې خبریالانې، مدني فعالانې او یا د امریکايي بنسټونو د کارکوونکو د کورنیو غړې دي چې د ټاکل شویو معیارونو له مخې د امریکا د کډوالۍ د پروګرامونو مستحقې دي.خو د ولسمشر ډونالډ ټرمپ له لوري د روان زیږدیز کال په پیل کې د یوه اجرایي فرمان له مخې، د دوی دوسیې وځنډېدې. دا فرمان باید یوازې ۹۰ ورځې پلي وای، خو له شپږو میاشتو ډېر وخت تېر شوی او لا هم نه کوم پرمختګ شوی او نه هم مشخص مهالویش اعلان شوی دی.دغو ښځو په ویډیويي پیغامونو کې چې د بشري حقونو ادارو ته یې لېږلي دي، شکایت کړی چې په «حقوقي خلأ» کې ژوند کوي، له روغتیايي خدمتونو، د کار او زده‌کړو اجازې او قانوني ملاتړ پرته، په ویره کې ورځې تېروي او د نیول کېدو او ایستلو له خطر سره مخ دي.د دغو ښځو له ډلې یوه ویلي: «موږ د امریکا تر څنګ ولاړې وو، اوس له هغوی غواړو چې زموږ تر څنګ ودرېږي.»د بشر د حقونو مدافع بنسټونه لکه د بشر د حقونو څار او د ملګرو ملتونو د کډوالو عالي کمېشنري هم خبرداری ورکړی چې د دې پروسې اوږدې ځنډېدنه د زرګونو افغان ښځو او ماشومانو ژوند له جدي ګواښ سره مخ کوي.په پای کې دغو افغان کډوالو په خپل پیغام کې ویلي: «موږ صدقه نه غواړو، یوازې هغه څه غواړو چې ژمنه یې شوې وه، څو وکولای شو خپل ژوند په عزت او خوندي ډول بیا جوړ کړو.»