ملګرو ملتونو د ایران له لوري د ایستل شویو کډوالو د بحران لپاره د نړېوال ځانګړي ګام غوښتنه وکړه

د ملګرو ملتونو ځانګړې استازې د اسلام‌قلعه له پولې د لیدنې پر مهال له ایرانه راستنېدونکو افغان کډوالو وضعیت سخت وباله او له نړیوالې ټولنې یې غوښتنه وکړه چې د دې خلکو د ملاتړ لپاره بېړنی او ګډ اقدام وکړي.روزوتا اوتنبایوا چې د افغانستان لپاره د ملګرو ملتونو د سرمنشي ځانګړې استازې ده، د اسلام‌قلعه پوله کې د ایستل شویو کډوالو د وضعیت د څېړلو په موخه تللې وه. هغې د ورځې په سطحه د لسګونو زرو افغانانو د ایستلو خبره تائید کړه او ویې ویل: «د دې پر ځای چې کورنیو ته د هېواد ستنېدنه یوه مثبته شیبه وي، هغه کورنۍ چې د څو لسیزو جګړو له امله وتلې وې، نننۍ ستنېدنه یې له پراخو رواني ستونزو او بې برخلیکۍ سره مل ده.»اوتنبایوا د افغانستان د اوسني وضعیت په ځانګړي ډول د هرات ولایت په اړه وویل چې نړیوال هېوادونه باید د بېړنیو مرستو او ملاتړ لپاره یو موټی شي.هغې چې له یو شمېر راستنېدونکو کورنیو سره یې کتلي، زیاته کړې چې د خلکو شخصي مرستې او د اوسنیو بنسټونو هڅې د دې لویې شمېرې راستنېدونکو لپاره بسنه نه کوي. دا کورنۍ د سرپناه او ورځنیو لومړیتوبونو په برابرولو کې له لویو ستونزو سره مخ دي.د دې سازمان د معلوماتو له مخې د روان زیږدیز کال له پیل راهیسې نږدې ۱،۳ میلیونه افغان کډوال هېواد ته راستنېدلي چې ډېری یې له ایران او پاکستان څخه دي.ملګرو ملتونو مخکې هم ویلي وو چې په اوسني بحران کې ۶۰ سلنه ښځې او ماشومان ډېر زیان منونکي دي.د طالبانو چارواکو په هرات کې هم تازه ویلي چې تر دې دمه له ایرانه ۵۷۴ زره ۲۴۱ افغان کډوال راستنېدلي چې ډېری یې ښځې او ماشومان دي.که څه هم یو شمېر خلک په خپله خوښه ستنېږي، خو د ایران حکومت په وروستۍ څپه کې ډېری افغان کورنۍ په زور ایستلي دي.