د طالبانو لاسوهنه په مرستو کې؛ په هرات کې ټولنیز یووالي له ګواښ سره مخ ده

یوشمېر باوري سرچینو «راوي زن» ته ویلي چې د طالبانو چارواکي، په ځانګړې توګه د هغوی استخباراتي څانګه هڅه کوي چې د خلکو د خپل‌سري مرستو بهیر تر خپل کنټرول لاندې راولي.یو باخبره کس چې له لومړیو ورځو راهیسې د جبري اخراج شوو کډوالو د مرستې په بهیر کې ونډه لرلې، وايي طالبانو ورته ویلي چې نور د کډوالو کمپونو ته د خلکو د ورتګ اجازه نشته.د سرچینې په وینا، هره ورځ لسګونه خلک او دوکانداران د ایران نه تازه راستنو شوو کډوالو سره د خوراکي توکو او نغدو پیسو مرسته کوي، خو طالبان د هغوی مخه نیسي.له اسلام‌قلعه پوله پرته چې د راستنېدونکو لومړۍ تمځای دی، په ښار کې د ټانک مولوي او مولانا عبدالرحمن جامي پارک هم د کډوالو د تم ځایونو په توګه بدل شوي دي.دا کډوال چې د خپلو اصلي ولایتونو پر لور د لېږد په تمه دي، هره ورځ د خوراکي توکو، موقتي سرپناه، د ښځو د حفظ‌الصحې توکو او دوايي مرستو ته اړتیا لري. ډېری یې د خپل ولایت د لېږد پیسې هم نه لري.یوې بلې سرچینې «راوي زن» ته ویلي: «پرون یو سړی راغی، دوه لکه افغانۍ یې راوړې وې چې مرسته وکړي، خو کله چې طالبانو مخه ونیوله او خلکو ته د وېش اجازه یې ورنه کړه، سړی هم خپله مرسته بېرته يوړه او طالبانو ته یې هم ورنه کړه.»راپورونه ښيي چې ځینې کورني خیریه بنسټونه او مرسته رسوونکي ادارې هم د طالبانو له خوا د مرستو د نیغ په نیغه کنټرول څخه ناخوښ دي.په ورته وخت کې ځینې د چارو شنونکي وايي که د طالبانو لاسوهنه دوام وکړي، د هرات د خلکو ترمنځ رامنځته شوې ټولنیزه همغږي به ټوټه شي.دا په داسې حال کې ده چې ملګرو ملتونو پرون خبرداری ورکړ چې په پوله او د هرات په بېلابېلو سیمو کې ډېری ښځې او ماشومان بېړنیو مرستو ته اړتیا لري او نړیوالې ټولنې ته یې د ګډ اقدام غوښتنه وکړه.د طالبانو دغه لاسوهنه په داسې وخت کې روانه ده چې هره ورځ د ایران له لوري د افغان کډوالو ایستل په شدت سره دوام لري او یوازې په تېرو ۲۲ ورځو کې له اسلام‌قلعه لارې څه باندې ۵۷۴ زره کسان بېرته هېواد ته راستانه شوي دي.