د افغانستان د خپلواکۍ جبهه: د طالبانو له‌خوا د ښځو نیول او تری تم کول نه بښونکي جنایت دی

د افغانستان د خپلواکۍ جبهې په یوه خپره کړې اعلامیه کې د طالبانو له‌خوا د ښځو خپله‌سري نیول او جبري تری تم کول «یو نه بښونکی او نه توجیه کېدونکی جنایت» بللی او په خورا سختو ټکو یې غندلی دی.
د دې اعلامیې له مخې، طالبانو په دې وروستیو کې په کابل کې خپله‌سري نیونې، تنظیم شوې تښتونې او د یو شمېر ښځو ځورونې ترسره کړي چې دا کړنې یې «د بشري کرامت، اخلاقي ارزښتونو او بشري حقونو ښکاره نقض» بلل شوی دی.
د افغانستان د خپلواکۍ جبهې خبرداری ورکړی چې دا ډول هدفمند ځپنه د ښځو د سپکاوي او په هېواد کې د ځانګړو قومي او ژبنیو ډلو د وېرې د خپرولو یوه سیستماتیکه تګلاره ده.
په اعلامیه کې ویل شوي: «په شخصي حریم لاس اچول او د ښځو بشري کرامت او بنسټیزې ازادۍ تر پښو لاندې کول نه مشروع دي، نه توجیه کېدلی شي او نه د منلو وړ دي.» دغه جبهه ټینګار کړی چې د طالبانو پر وړاندې به د دې ظالمانه کړنو پر ضد «په ټول ځواک» ودریږي.
د خپلواکۍ جبهې دا هم خبرداری ورکړی چې له دې وروسته به د امر بالمعروف او نهی عن المنکر اداره د دې جبهې د جنګیالیو بریدګرو لپاره «مشروع موخه» وي او د دې کړنو بشپړه مسوولیت به د طالبانو پر غاړه وي.
یادونه دې وي چې سرچینو «راوي زن» ته هم تایید کړې چې د طالبانو د امر بالمعروف او نهی عن المنکر ځواکونو په ښارنو سیمه کې یو شمېر ځوانې ښځې نیولې دي.
په ټولنیزو رسنیو خپرې شوې ویډیوګانې ښيي چې څو ښځې په ښکاره ډول وېره لري او د طالبانو د وسلوالو له‌خوا د دې ډلې موټرو ته بېول کېږي.
عیني شاهدان وايي چې دا نیونې پرته له کوم مشخص دلیل او له مخکې له خبرتیا ترسره شوې دي.
ویل کېږي چې ډېری دغه ښځې له بازارونو، کوڅو، روغتونونو او د ښارنو له پلورنځایونو نیول شوې دي.