د نړيوال کرکټ شورا: په جلاوطنۍ کې افغان ښځينه لوبغاړې به په نړيوالو سياليو کې ګډون وکړي

د نړيوال کرکټ شورا (ICC) اعلان کړی چې د جلاوطنۍ په حال کې د افغان ښځينه لوبغاړو د ملاتړ د نوښت په دوام کې، دوی ته په نړيواله کچه د ګډون نوي فرصتونه برابر شوي دي.د آی‌سي‌سي د کلنۍ غونډې د پرېکړو له مخې چې تېر اونۍ په سنګاپور کې ترسره شوه، هغه افغان ښځينه لوبغاړې چې د طالبانو د پاليسيو له کبله له ورزشه بې‌برخې شوې دي، کولی شي په مهمو نړيوالو سياليو لکه د ښځينه وو د ۲۰۲۵ کرکټ نړيوال جام او د ښځينه وو د ۲۰۲۶ T20 نړيوال جام کې چې په انګلستان کې کېږي، ګډون وکړي. دغه لوبغاړې به همداراز د کوربه هېوادونو د مسلکي پرمختګ پروګرامونو او کورنيو سياليو ته هم لاسرسی ولري.د نړيوال کرکټ شورا په خپره کړې اعلاميه کې ويلي چې دا نوښت د همدې شورا له لوري، د دې شورا د مرستيال عمران خواجه تر څارنې لاندې او د درېيو لويې کرکټ ادارو ـ د هند کرکټ بورد (BCCI)، د انګلستان او ويلز بورد (ECB) او د آستراليا کرکټ (CA) په نږدې همکارۍ پر مخ وړل کېږي.په دې اعلاميه کې ويل شوي چې دا هڅه د افغان ښځينه وو د ملاتړ او د هغوی لپاره د کرکټ په ډګر کې د مساوي پرمختګ د فرصتونو د برابرولو د ژمنې يوه برخه ده.دا ګام په داسې حال کې کېږي چې د هېواد دننه افغان ښځينه لوبغاړې له ورزشي فعاليتونو بې‌برخې دي او ډېرو يې اړتيا پېښه کړې چې افغانستان پرېږدي.